Cпортын алдартнуудын гавьяаг мөнхөллөө | News.MN

Cпортын алдартнуудын гавьяаг мөнхөллөө

Хуучирсан мэдээ: 2014.10.18-нд нийтлэгдсэн

Cпортын алдартнуудын гавьяаг мөнхөллөө

Монгол улс зуны олимпийн наадамд анх оролцсоны түүхт 50 жилийн ойг ёслол төгөлдөр тэмдэглэж, МҮОХ-ны Ерөнхийлөг Д.Загдсүрэн, ССАЖ-ын Дэд сайд М.Түмэнжаргал нар “Токио-1964” зуны XVIII олимпийн наадамд оролцсон ахмадуудад баяр хүргэн, ОУОХ-ноос ирүүлсэн Олимпод оролцогчдын энгэрийн тэмдгийг гардуулав. Одоогоос 50 жилийн өмнө 35 хүний бүрэлдэхүүнтэй Монголын баг тамирчид чөлөөт бөх, буудлага, дугуй, гимнастик, хөнгөн атлетикийн төрлөөр оролцож байсан түүхтэй.

Мөн үеэр Үндэсний цэцэрлэгт хүрээлэнд “Олимпийн төгөл” нээх үйл ажиллагаа болж, үе үеийн тамирчид, дасгалжуулагчид, зүтгэлтнүүд 100 мод тарьж, спортын алдартнуудын гавъяаг мөнхөллөө.

МҮОХ нь спорт-олимпизмийг сурталчилах үйлсэд хамтран ажиллах зорилгоор Монголын спортын сэтгүүлчдийн холбоотой хамтын ажиллагааны гэрээнд гарын үсэг зурав. Гэрээ ёсоор МҮОХ нь бүс нутаг, тив дэлхий, олимпийн наадамд спортын сэтгүүлчдийг өргөнөөр оролцуулахад дэмжлэг үзүүлэх юм.

Азийн элсний спортын IV наадам нь 11 сарын 14-23- ны өдрүүдэд Тайланд улсын Пукет хотноо спортын 26 төрлөөр болно. Манай улсаас элсний бөх, самбо, жиү-жицү, петанк, гандбол, сагсан бөмбөг, орчин үеийн таван төрөлт, муатай, триатлон, кураш бөхийн төрөлд 90 гаруй тамирчин, дасгалжуулагч, албаны хүний бүрэлдэхүүнтэй оролцохоор мэдүүлгээ хүргүүлээд байна.

МҮОХ нь “Рио-2016” зуны олимпийн наадмыг үзэх хөгжөөн дэмжигчдийг зохион байгуулах онцгой эрхийг “Нью жуулчин турс” компанид олгож, хамтын ажиллагааны гэрээнд Ерөнхийлөгч Д. Загдсүрэн, Ерөнхий захирал Ш.Нэргүй нар гарын үсэг зурав. “Нью жуулчин турс” компани нь МҮОХ-ны албан ёсны түнш бөгөөд “Афин-2004”-өөс эхлэн нийт 2000 гаруй спортын хөгжөөн дэмжигчдийг олимпийн наадам үзүүлсэн билээ.

Ерөнхийлөгч Д.Загдсүрэн Хөнгөн атлетикийн холбооны түнш, БНСУ-ын иргэн Юнь Хан-Чоль, Ү Хён-Жин нарыг МҮОХ-ны “Олимпийн алдар” одонгоор шагнав.

Ирэх долоо хоногт Бээжин хотноо болох Зүүн Азийн Наадмын Холбооны гүйцэтгэх зөвлөлийн хурлаар 2019 оны Зүүн Азийн Залуучуудын Спортын анхдугаар наадмыг зохион байгуулах хотыг сонгож шалгаруулах юм. Энэ эрхийн төлөө Ханжоу /БНХАУ/, Тайжүн /Тайвань/, Улаанбаатар /Монгол/ хотууд өрсөлдөх юм.

СПОРТЫН ХОЛБООД

Цанын холбооны тайлан сонгуулийн хурал болж, 1997 оноос хойш тус холбоог тэргүүлсэн Р.Раш улиран сонгогдов. “Торино-2006”, “Ванкувер-2010” олимпод тамирчнаар оролцож байсан Э.Очирсүрэн шинэ ерөнхий нарийн бичгийн даргаар сонгогдсон байна.

Бадминтоны холбоо, Азийн бадминтоны холбоотой хамтран дасгалжуулагчийн анхан шатны сургалтыг Малайз улсын мэргэжилтэн Самбентаны Севаперүмалын удирдлага дор явуулж байна. Сургалтад Архангай, Дархан, Дорнод, Хэнтий, Өмнөговь, Улаанбаатар зэрэг аймаг, хотуудаас нийт 40 гаруй багш хамрагдав.

Шатрын холбооны шинэ ерөнхий нарийн бичгийн даргаар Х.Эрдэнэдорж томилогджээ.

ДОПИНГ

Допингийн эсрэг үндэсний төвийн гүйцэтгэх зөвлөлийн гишүүдийг МҮОХ-ны ерөнхийлөгч хүлээн авч уулзлаа.

www.olympic.org, www.ocasia.org

МОНГОЛЫН ҮНДЭСНИЙ ОЛИМПИЙН ХОРОО

0 сэтгэгдэл

News.mn сайтад сэтгэгдэл оруулахад анхаарах зүйлс

NewsMN Гар утасны хувилбар Татах
NEWS.mn

Мэдээллийн эх сурвалж