Наро Банчэн хувилгааны долдугаар дүр тодорлоо | News.MN

Наро Банчэн хувилгааны долдугаар дүр тодорлоо

Хуучирсан мэдээ: 2014.10.15-нд нийтлэгдсэн

Наро Банчэн хувилгааны долдугаар дүр тодорлоо

Дээрхийн гэгээн 14 дүгээр Далай лам Данзанжамц ашид мөнхийн ерөөлөөр өлзий учралын шүтэн барилдлагат хөх морин жилийн намрын дунд сарын 17-ны Балжинням, Дашням давхцсан билэгт сайн өдөр Эртний Энэтхэгийн 84 шидтэний нэг Наро Банчэн хувилгааны 7 дугаар хойд дүрээр Завхан аймгийн Отгон сумын уугуул Баянмөнхийн Цэдэн-Ишийг тодруулж, өргөмжлөн батламжиллаа.

Наро Банчэн хувилгаан өмнө нь Энэтхэг орноо мэндэлж 5 удаа,  цаст Төвдийн орноо 4 удаа, Монгол газар 6 удаа хувилан түмэн өлзий гийсэн түүхтэй.

Эртний мэргэдийн сургаалд “мөнх тэнгэрийн зарлигтай, хөх тэнгэрийн хутагтай, их төрийн тамгатай хүмүүн болбоос  хутагт хүмүүн  мөн болой” гэсэн байдаг.

Наро Банчэн хувилгааны 6 дугаар дүр Жүгдэрнамжил лагшин гэрэлт биеэ хураахаасаа өмнө "Би дараа төрөлдөө Отгонтэнгэр хайрхандаа голоо өгсөөд төрнө" гэж ерөөл тавьсныг нутгийн зон олон ярьдагчлан Наро Банчэн хувилгааны 7 дугаар дүр Отгонтэнгэр хайрханы өвөрт төржээ. Наро Банчэн Хувилгааны долдугаар дүрээр тодрохоосоо өмнө эрдэм чадал нь онцгой тодрон ялгарч, олон түмэнд хувилгаан хэмээн хүндлэгдсээр иржээ. 

Далай багш Наро Банчэн хувилгааны долдугаар дүрийн даахийг нь үргээн гэлэн сахил хүртээж, номын Данзанлхүндүв хэмээн номын нэр хайрлалаа. Шинэ тодорсон Наро Банчэн хувилгаанд Шинжлэх ухаан төгс хөгжиж байгаа 21 дүгээр зуунд шинжлэх ухааны эрдэм боловсрол эзэмшиж байгааг Далай лам  сайшааж урамшуулан, сургуулиа амжилттай дүүргэхийг ерөөж, үргэлжлүүлэн бурханы номд шамдах хэрэгтэйг онцгойлоод эх болсон зургаан зүйл хамаг амьтны тусын тулд агуу их үйлсийг бүтээхийг онцгойлон захисан байна.

Энэтхэг улсын Дарамсала хотод хувилгаан өөрийн шавь сүсэгтнүүдийн хамт морилж, Далай багшид бараалхаад эх орондоо өнөөдөр ирлээ. Гэгээн номын  цагаан буян арван зүгтээ тархаж, сайн үйлс бүхэн сар, нарны цацраг мэт түгэн  дэлгэрэх болтугай.

Б.ЭНХ

0 сэтгэгдэл

News.mn сайтад сэтгэгдэл оруулахад анхаарах зүйлс

Avatar

irgen 2014-10-15 202.170.82.54

yasan tsarailag huvilgaan be

Avatar

Зочин 2014-10-15 202.179.20.161

хойд, урд дүрээ гэж

NewsMN Гар утасны хувилбар Татах
NEWS.mn

Мэдээллийн эх сурвалж