УИХ дахь МАН-ын бүлгийн дэд дарга, Төсвийн ажлын хэсгийн ахлагч Д.Оюунхорол 2015 оны төсвийн төслийг буцаахыг шаардсан таван зүйл бүхий шаардлагыг УИХ-ын дарга З.Энхболдод хүргүүлсэн. МАН-ын бүлгээс Засгийн газраас УИХ-д өргөн мэдүүлсэн Монгол Улсын нэгдсэн төсвийн 2015 оны төсвийн хүрээний мэдэгдэл, 2016-2017 оны төсвийн төсөөллийн тухай хуулийн төсөл,  Монгол Улсын 2015 оны төсвийн тухай хуулийн төсөл болон дагалдаж өргөн баригдсан хуулийн төслүүд нь улс орны эдийн засгийн нөхцөл байдлыг бодитой үнэлж дүгнээгүй, төсөв мөнгөний бодлого хоорондоо уялдаагүй, эдийн засгийн хямралаас гарах бодлого, арга хэмжээ тодорхойгүй, эдийн засгийн алдаатай бодлогын үр дагаврыг ард иргэд, аж ахуйн нэгжүүдэд үүрүүлэн, тэднийг татварын дарамтад оруулж, хүчин төгөлдөр мөрдөгдөж байгаа олон хууль, тогтоомжийг зөрчсөн гэж үзжээ. Шаардлагад  дурдсанаар 2015 оны төсвийн тухай хуулийн төсөлд зээлийн үйлчилгээний төлбөрт 707.9 тэрбум төгрөг буюу нэгдсэн төсвийн урсгал орлогын 10 хувийг зарцуулахаар төсөвлөсөн нь 2011 оны нэгдсэн төсвийн зээлийн үйлчилгээний төлбөрт төлсөн 37.3 тэрбум төгрөгтэй харьцуулахад 19 дахин их болж эрс нэмэгдсэнийг эсэргүүцэж байгаа аж. Мөн өрийн нэр томъёоны тодорхойлолтыг өөрчлөх, өрийн дээд хязгаарыг ДНБ-ний 40 хувиас 90 хувь болгон нэмэгдүүлэхээр Төсвийн тогтвортой байдлын тухай хуульд нэмэлт, өөрчлөлт оруулах хуулийн төслийг хууль зөрчсөн талаар дурдсан байна.

С.ОТГОН