Сүүний үнээг цохиж, өвсний сэрээгээр хатгаж “хөнөөж” байгаа видео бичлэгийг тухай амьтны эрх хамгаалагчид “You Tube”-д тавьсны дараа олон хүн ууртай хариу илгээж, үзэл бодлоо илэрхийлцгээсэн. Гэсэн хэдий ч интернетийн өөр буланд огт өөр хүмүүс энэ бичлэгийн талаар бухимдал, үзэл бодол, тайлбараа илэрхийлж байна. АНУ-ын фермерүүд блог хөтөлж, өөрсдийн фермийн амьдралын талаар видео оруулж, өөрсдийн мал аж ахуйн салбарыг хамгаалан “Facebook”-т хуудас нээн өөрсдийгөө хамгаалж дуу хоолойгоо илэрхийлж байна гэж “Associated Press” агентлаг мэдээллээ. Фермерүүдийг ихэвчлэн цахим техник, нийгмийн харилцааны сайтуудаар барагтай бол зочилдоггүй хүмүүс гэж америкчууд боддог. Гэвч техник хэрэглэхдээ сайн байгаль хамгаалагчид, амьтны эрх хамгаалагчид тэднийг нийгмийн харилцааны сайтуудыг хэрэглэж хариу өгөхөд хүргэсэн бололтой. Смартфонтой фермерүүд тракторын суудал дээрээсээ статусаа апдейт хийн шинэчилж, Твиттерлүү цөөн үгтэй мессеж нисгэж байна. Тэд ферм дээрх өөрсдийн амьдралаа, олон нийт хэрхэн өөрсдийг нь ойлгодоггүй талаар, мөн фермер дээр ганцаардах үедээ бусадтай мэдээлэл солилцохоор интернетэд орцгоож байна. “Олон нийтэд маш их сөрөг мэдээлэл тараасан байна. Харин хэн ч үнэн мэдээлэл хүргэхгүй байна” гэж хоёр дахь үедээ сүүний үнээ маллаж байгаа Төв Калифорнийн фермер Рей Прок Жр ярьж байна. Тэрээр өдөр тутамд хийдэг ажлаа, яаралтай худаг гаргахаас аваад малын баас, бууцаа цэвэрлэх зэрэг ажлуудын талаар хүртэл блогтоо бичиж, твит хийдэг. Прок дээр дурдсан видеонд хариу бичсэн хүмүүсийн нэг бөгөөд тэрээр үүнийгээ хэрэгжүүлэхийн тулд гэр бүлийнхээ амралтаас хугаслан байж хариу явуулсан гэнэ. “Миний мэдэх малд хайртай бүх фермер амьдралдаа  хэзээ нэгэн цагт малныхаа сайн сайханг гэр бүлийнхээ сайн сайхнаас дээгүүр тавьж байсан” гэж тэр блогтоо бичжээ. Прок эхнэр, хоёр хүүхдийнхээ хамт 240 акр талбай бүхий фермтэй бөгөөд түүний 9 настай хүү нь гэр бүлийнхээ ажил төрөлд болон 450 үнээ малладаг аавдаа тусалж эхэлсэн гэнэ.
“Гэр бүл маань энд амьдардаг- би агаарт, усанд, байгаль орчинд, үнээнүүддээ санаа тавьдаг. Энд байгааг би бодитоор нь хүмүүст харуулж чаддаг ч болоосой гэж хүсэж байна” гэж тэрээр хашаа хороонуудынхаа дундуур явж байхдаа ярьж байв.
Сүүний чиглэлийн үнээний салбарт байгаа асуудлын талаар амьтны эрх хамгаалах бүлгийнхэн видео хийж “You Tube”-д тавьсан  юм. Эхний видеон дээр хөл дээрээ ч бараг зогсож чадахгүй байгаа үнээг ачаа өргөгч сэрээтэй машинаар дайрч байгаа үйл явдэл байдаг бол өнгөрсөн оны 10 сард интернетэд тавигдсан өөр нэг бичлэгт “Vermont”-ын мал нядалгааны газарт төрөөд ганц хоног болж байгаа тугалыг ажилчид нь цохиж алж байгаа үйл явдал гардаг.

Энэ бичлэгүүдийг нийтийн ТВ-ийн сувгаар дамжуулах гэхэд төлөх мөнгө байгаагүй тул нийгмийн харилцааны үнэгүй сувгуудаар дамжуулж олон нийтэд хүргэхээс өөр арга байгаагүй. Фермерүүд бидний эсрэг дуу хоолойгоо нийлүүлж байхын оронд өөрсдийнх нь салбарт байгаа болж бүтэхгүй зүйлийг засаж залруулсан нь дээр. Тэгэх юм бол бид тэдний талаар ингэж видео хийж цацахгүй шүү дээ гэж “Mercy for Animals” хэмээх амьтны эрхийг хамгаалах байгууллагын захирал Натан Ранкл ярьж байна.

Фермерүүд дээрх видеонууд цочирдом хэдий ч мал аж ахуйн салбарт байгаа нийтлэг байдал, малчид малтайгаа яаж харьцдагийг бүрэн төлөөлж харуулж чадахгүй гэж ярьж байна. Америкчууд малын фермээс хөндийрөөд хэдэн үе болж байгаа тул өөрсдийнх нь хүнс яаж бэлтгэгддэг талаар ойлголт муутай. Тэгтэл зарим хүмүүс интернетээр фермүүдийн талаар элдэв зүйл хүмүүст ойлгуулах гэж оролдож байна. Жинхэнэ фермерүүдийн дуу хоолойг хүмүүст хүргэхгүй бол олон нийт тэнцвэргүй мэдээлэл авч болзошгүй гэж ярьж байна.

“Бид хүмүүсийн ярилцлагын нэг хэсэг болж чадахгүй байсан. Бид өөрсдийн түүхээ хүмүүст хүргэж чадахгүй байсан. Хэрвээ бид өөрсдийнхөө төлөө дуугарахгүй юм бол өөр хүмүүс бидний талаар ярих бөгөөд тэд бидний талаар юу ч гэж ярьж магадгүй” гэж Прок ярьж байна. Түүнийг одоо Твиттерт бараг 11,000 хүн дагадаг бөгөөд тэдний олонхи нь түүнтэй адил Фаренхайтын 100 хэмийн халуунд ажлаа эрхэлдэг фермэрүүд байдаг. Гэхдээ тэр заримдаа өөрийг нь дагадаг ч, фермерийн амьдралаас төсөөрсөн хүмүүст фермийн талаарх ойлголттой болоход нь тусалж “бэлчээр гэж юу вэ?”, “гэр бүлийн ферм гэж юу вэ?” гэх мэт асуултуудад хариулт өгдөг.

Прок өөр цөөн тооны хэдэн фермертэй хамтран “AgChat Foundation” хэмээх байгууллага байгуулсан бөгөөд тэд бүр олон фермерийг You Tube, MySpace, Facebook, Twitter зэрэг сайтуудыг хэрэглэж сураад, олон нийттэй харьцдаг болгоход туслахаар оролдож байна.

Тэд энэ оны наймдугаар сард фермерүүдэд зориулсан нийгмийн харилцааны интернетийн хэрэгсэл, сайтуудыг хэрэглэх тухай сургалт явуулах гэж байгаа бөгөөд сонирхож байгаа ч хэрхэн ашиглахаа, ямар багаж хэрэгсэл хэрэглэхэээ мэдэхгүй байгаа хүмүүст смартфон, лаптоп, өргөн зурвасын интернет зэрэг төхөөрөмжүүдийг хэрэглэх аргачлал болон зарим төхөөрөмжүүдийг хандивын мөнгөөр авч өгөхөөр бэлтгэж байна.

Т.Бадрах