Хоолоо хурдан идэхээ боль | News.MN

Хоолоо хурдан идэхээ боль

Хуучирсан мэдээ: 2014.10.09-нд нийтлэгдсэн

Хоолоо хурдан идэхээ боль

Удаан идэж сурахад тань туслах 6 зөвлөгөө

Хоолоо хурдан иддэг хүн их идэх хандлагатай байдаг. Хэрвээ та ямагт бусдаас түрүүлж хоолоо идэж дуусгадаг бол хурдан иддэг зуршлаасаа салахад тань туслах дараах 6 зөвлөгөөг танд хүргье.

“Хүмүүс намайг тоос сорогч гэж дууддаг!” гэж миний нэг өвчтөн надад саяхан ярьсан юм. Тэр бүхий л амьдралынхаа туршид хурдан идэж байгаа нэгэн. “Бид ах, эгч долуулаа өссөн. Аав, ээжтэй нийлээд есөн хүн ширээнд сууж хооллодог байлаа. Ээжийг хоол авч ирж, ширээн дээр тавьмагц бид өөрт ногдох хувиа авах гэж, бас авсан хоолоо аль болох хурдан идэх гэж уралддаг байсан. Хамгийн түрүүлж идсэн хүн хоол дуусахаас өмнө нэмүүлж идэх боломжтой болохоор тэр шүү дээ” хэмээн тэр өгүүлсэн юм. Есүүлээ ширээнд сууж хооллодог байсан тэр үе хэдийн ард хоцорсон ч түүний хурдан иддэг зуршил хэвээр үлдсэн байна. Энэ залуу одоо ч нүд ирмэхийн төдийд тавгаа хоосолж чаддаг нэгэн.   

Би ийм үйлчлүүлэгчдээсээ хоолоо идэхэд хэр хугацаа зарцуулж байгаагаа байнга тэмдэглэж, мэдээлж байхыг зөвлөдөг юм. Тэд зургаа, долоохон минутын дотор хичнээн их хоол идэж байгаа нь үнэхээр гайхаш төрүүлдэг. Дээр ярьсан үйлчлүүлэгчийн нэгэн адил хүний хооллох зуршил хүүхэд наснаас улбаатай байдаг. Гэхдээ хурдан идэх өөр шалтгаан ч бий. Хүн хэт өлссөн үедээ юмуу эсвэл үнэхээр арааны шүлс асгарам сайхан хоол харсан үедээ илүү хурдан, бас илүү их идэх хандлагатай байдаг. Эдгээр тохиолдолд идэх боломж гармагц хүн шууд л хоол руу “дайрдаг”. Мөн хэт өлссөн үедээ хүн ихэнхдээ эрүүл биш, илчлэг ихтэй хоол сонгох хандлагатай байдаг.

Цадсан гэсэн дохио ходоод гэдэснээс тархи руу очиход 20 орчим минутын хугацаа шаардагддаг. Гэхдээ энэ нь хэр их хоол идэж байгаатай огт хамаагүй. Энэ бол цаг хугацааны тухай асуудал. Илүү их идлээ гээд тархинд мэдээлэл хурдан очихгүй. Ямар ч тохиолдолд мэдээлэл 20 минут хоцорч очдог. Тиймээс энэ үйл явцыг ойлгох хангалттай хугацааг өөртөө өгч, идэх хурдаа сааруулж чадвал хүн бага хэмжээний хоол идээд ч цадаж болно. Хооллох хурдаа сааруулахад тань туслах хэдэн зөвлөгөө өгье. 

 

Удаан идэж, хооллох зуршлаа сайжруул

Ээлжээр хоолло

Бүх хоолоо нэг тавган дээр овоолж суухын оронд ээлж дарааллаар хооллохыг хичээ. Салад буюу ногоогоо эхний ээлжинд ид. Ингэснээр хоолныхоо хамгийн илчлэг багатай хэсгийг эхэлж идэн, гэдсээ цатгах боломжтой болно. Дараа нь үндсэн хоолоо ид. Хэрвээ хоолоо бүгдийг нь идэж дуусгах цаг хугацааны боломж байхгүй бол (ажил дээр үдийн цайны завсарлагын үеэр гэх мэт) цагтаа амжиж хооллох гэж сандрахын оронд хоолныхоо үндсэн хэсгийг идээд, үлдэгдлийг нь дараа зууш болгон хэрэглэхээр хадгалж болно.

Бага багаар хазаж ид

Хүн хэдий чинээ том хазна, төдий чинээ хурдан иддэг. Бага багаар хазаж идвэл хоолоо удаан идэх боломж гарахын зэрэгцээ тархинд мэдээлэл очих хугацааг нөхөхөд тусална. Хэрвээ зүсэж идэх хоол бол идэх явцдаа зүсэх хэрэгтэй. Хэрэв эхлээд бүгдийг нь жижиглэж зүсвэл идэж дуусгахад хэтэрхий хялбар болно.

Эслэг ихтэй хүнс түлхүү хэрэглэ

Эслэг ихтэй хоол нь эслэг багатай хоолыг бодвол сайн цатгахаас гадна идэхэд илүү их хугацаа шаарддаг. Жигнэмэг, нарийн боовтой харьцуулахад боловсруулаагүй жимс, хүнсний ногоо, бүхэл үр зэргийг илүү их зажилж идэх болдог тул эдгээр нь хүний идэх хурдыг сааруулдаг. 

Аманд байгаа хоолоо зажилж дуусаад залгих хүртлээ халбагаа хоолондоо бүү дүр

Хурдан иддэг хүмүүс аманд буй хоолоо идэж дуусаагүй байхдаа хоолоо дахин халбагадан, амандаа хийдэг. Хэрэв та ингэдэг бол дарааллаа өөрчлөх хэрэгтэй. Зажилж дуусаагүй байхдаа дахин халбагадаж амандаа хийх бус харин эхлээд “зажилж дуусаад залгиад”, дараа нь “дахин халбагадах” нь зүйтэй.

Үмхэлт хооронд халбага сэрээ болон гараар барьж иддэг хоолоо доош тавь

“Жирийн” зүйл мэт санагддаг болтол нэлээд хугацаа шаардах өөр нэг зуршил бол энэ. Гэхдээ хийж сурвал танд үнэхээр хэрэг болно. Өмнөх хэсэгт дурьдсан “залгих – хоолоо халбагадах – амандаа хийх” тактикийг хэрэгжүүлж нэгэнт заншсан бол та үүн дээрээ 2 алхмыг нэмж хэрэгжүүлж сурах хэрэгтэй. Үүнд:  “залгих – халбага/сэрээгээ ширээн дээр тавих – халбага/сэрээгээ авах – хоолоо халбагадах/сэрээдэх – амандаа хийх”. Хэрэв та бургер, сэндвич мэтийн халбага, сэрээ орохооргүй хоол идэж байгаа бол шууд барьж байгаад идэж дуусгах хүслээ хязгаарлахыг хичээгээрэй. Түүний оронд дахин хазахаасаа өмнө тавган дээрээ буцаан тавьж сурахыг хичээгээрэй.

Хоолоо идэж байх явцдаа усыг байнга бага багаар уу

Хоолныхоо дундуур байнга ус ууж занш. Ингэснээр таны хооллох хурд саараад зогсохгүй хоолтойгоо хамт илүү их ус хэрэглэсний нөлөөгөөр та илүү сайн цадна.

***

Хоолоо удаан идэх нь жин хасахад нөлөөлдөг болох нь тогтоогдсон. Гэхдээ хүмүүсийн хувьд хоолоо байнга удаан идэж занших хэцүү. Жин хасах бусад стратегийн нэгэн адил үүнд сургуулилалт хэрэгтэй. Их ажлын дундуур удаан идэх гэж өөрийгөө хүчлэхийн оронд тусгайлан цаг гаргаж, тааваараа хооллох нь зүйтэй. Хамгийн сүүлд барианд орвол зөвд тооцогдох ганц уралдаан чинь хооллолт юм шүү дээ.

 

Бичсэн: Сюзан Бовермэн, шинжлэх ухааны зохиолч, RD, CSSD. Сюзан нь Herbalife-ийн цалинтай зөвлөх юм.

0 сэтгэгдэл

News.mn сайтад сэтгэгдэл оруулахад анхаарах зүйлс

NewsMN Гар утасны хувилбар Татах
NEWS.mn

Мэдээллийн эх сурвалж