“Очирваанийн хүлэг” МСУХ-ны гүйцэтгэх захирал Б.Мэндбилэг: “Шигшмэл хурд” уралдаанд 2000 гаруй хурдан хүлэг тоосоо өргөсөн

-Богд Очирваанийн нутгийнханд уяачдын өдрийн мэндийг дэвшүүлье. Сайн явцгааж ирэв үү?

-Сайн явж ирлээ. Дэлхийн дээд амжилтанд монгол адуугаа бүртгүүлсэн явдал бол үндэсний өв соёлоо сурталчлан баталгаажуулсан том арга хэмжээ юм. Энэхүү түүхэн арга хэмжээний өдрөө уяачийн өдөр болгон зарлаж байгаад хувь хүнийхээ хувьд, холбооны удирдлагын хувьд туйлын баяртай байна. Өнгөрсөн жилийн арга хэмжээнд Завхан аймаг бүх сумынхаа төлөөлөл уяачдын хамтаар ирж оролцсон. Мөн Улаанбаатар хотод байдаг нутгийн уугуул иргэд бидний тэрхүү үйл хэрэгт нэгдэн нэлээд өргөн бүрэлдэхүүнтэйгээр оролцсон. Ер нь өнгөрөгч 2013 он Завханы уяачдын хувьд олон чухал явдлаар дүүрэн онцлог сайхан жил байсан. Яагаад гэхээр манай нутгаас МУ-ын Тод манлай уяач цолтон хоёр, улсын Алдарт уяач цолтон хоёр төрлөө. Уяачид, морины зүтгэлтнүүд маань Тэсийн голын  адуугаа сайжруулах асуудалд анхаарал хандуулж, бодлогын хэмжээнд ажиллахаар боллоо.

-2014 онд Завхан аймгийн МСУХ-ны ээлжит бага хурал болж, удирдлагын баг шинэчлэгдсэн. Шинэ баг хамт олон ажлаа авсан даруйдаа хэд хэдэн чухал арга хэмжээг зохион байгуулах шиг болно лээ. Тэр талаараа дэлгэрүүлээч?

-Аймгийн МСУХ-ны ээлжит бага хурлаар бүтэц зохион байгуулалтын шинэчлэл хийж, холбооны тэргүүнээр алдарт хүрэн халзан морины эзэн Ш.Батсамбуу сонгогдож, миний бие гүйцэтгэх захирлын албыг хашихаар болсон. Манай холбоо 29 тэргүүлэгч, сумын холбоодын 1000 гаруй гишүүнтэй. Бид ажлаа аваад хамгийн нэгдүгээрт, аймгийнхаа адууны чанарыг сайжруулах, тэр дундаа Тэсийн голын адуугаа чанаржуулж, Тэс угшлынхаа нэрийг өргөх гэх мэт хэд хэдэн зорилт дэвшүүлээд байна. Хоёрдугаарт, уяачдынхаа идэвхийг сэргээж, үүрэг хариуцлагыг нь нэмэгдүүлэх, бүртгэлжүүлэхэд анхаарч ажиллана. Түүнчлэн энэ нутгийн алдартай уяачид, хурдан хүлгүүдээ алдаршуулах. Тэдний амжилт, алдрын түүхийг өгүүлсэн үзмэртэй болохоос эхлээд уяачдын холбоо өөрийн өргөөтэй болох гэх зэрэг олон чухал асуудлыг шийдэхээр ажиллаж байна. Уяачдын өдөрлөг өнөөдөрийн арга хэмжээнд ирээд бид бас нэг зүйлийг ажиглаж, санаа авлаа.

-Нууц биш бол хуваалцаач?

-Дараа жил ирэхдээ нутгийн брэнд болсон суран эдлэлээрээ үзэсгэлэн гаргамаар юм байна. Манай аймгийнхан суран эдлэлийг онцгой сайхан хийдэг.

-Тэлмэн сум хоёр түмэн адууны баяр тэмдэглэж, аймгийн шигшмэл хүлгүүдийг шалгаруулсан байна лээ. Тэр талаараа манай уншигчдад мэдээлэл өгөөч?

-Өнөө жил манай Завхан аймгийн 10 сум үүсч байгуулагдсаны түүхт ойгоо тэмдэглэсэн. Дээр нь Тэлмэн сум түмэн адууны баяр хийлээ. Нутгийн адууныхаа чанарыг дээшлүүлэх холбооны бодлого зорилт дээрээ үндэслээд бид Завхан аймгийнхаа морьдын чансааг тогтоох томоохон уралдааныг анх удаа зохион байгуулсан. Завхан аймгийн “Шигшмэл хурд” уралдаанд 24 сумаас төлөөлөл 2000 гаруй хурдан хүлэг ирж оролцлоо. Их насанд л гэхэд 200 гаруй морь мордсон. Ер нь хамгийн цөөн нь даага 150 хүргэж уралдлаа. Энэ дүнгээс л харахад чансаа өндөртэй байж, үнэхээр шигшмэл хурдан хүлгүүдээ тодруулж чадсан гэж бодож байгаа. Уралдааны цар хүрээгээ өргөн байлгах, уяачдынхаа урмыг сэргээх үүднээс дээд гурван насны түрүү морьдоо жийп машинаар, бага гурван насны түрүүгээ таван сая хүртэл төгрөгөөр шагнасан нь уяачдаас ихээхэн талархал хүлээсэн. Цаашид энэхүү уралдаанаа уламжлал болгон зохион байгуулж байхаар болсныг хэлэхэд таатай байна. ММСУХ жил бүрийн наймдугаар сарын 9-нийг уяачдын өдөр болгон зарлаж байгаатай холбогдуулан наймдугаар сард уяачдынхаа баярыг тэмдэглэнгээ төвийн бүсийн шигшмэл хурд уралдаанаа хийдэг болъё хэмээн бодож сууна.

-Баруун бүсийн уралдаанд Завханы, тэр дундаа Сантмаргазын уяачид амжилттай наадсан. Ер нь морин жил Очирваань нутгийнханд хэр ээлтэй байв?

-Баруун бүсийн уралдаанд манай Завханчууд жил болгон тогтмол амжилттай оролцдог. Ховд аймагт болсон энэ жилийн уралдаанд МУ-ын Алдарт уяач Борнойн Баасанжав амжилттай наадан, МУ-ын Манлай уяач цолны болзлоо биелүүлсэн. Мөн Яруу сумын уугуул, ММСУХ-ны тэргүүлэгч Даш-Өлзий Алдарт  маань нэлээд хэдэн айраг авлаа. Хонь жилийн босгон дээр Завхан нутгаас дахин хоёр Манлай уяач төрөх болов уу хэмээн хүлээж байна даа.

-Ярилцсанд баярлалаа. Дараа дараагийн ажилд нь амжилт хүсье. Замдаа сайн яваарай.

-За баярлалаа. “Тод магнай” сэтгүүлийн хамт олондоо ч баярлалаа. Манай аймгийн уяачдын тухай сайхан сэтгүүлийг гаргаж өгсөн явдалд талархал илэрхийлье. Уяачид маань сэтгэл их өндөр байгаа. Та бүгдийг дахин дахин ирж, бидэнтэй хамтран ажиллаж байгаарай хэмээснийг энэ дашрамд уламжилъя.

-Урьсанд баярлалаа. Замын хүн саатах Завхан нутагт очихдоо баяртай байна.

А.Тэлмэн

Эх сурвалж: www.todmagnai.mn