19,30 цаг.

Азийн зуны спортын XVII наадам БНСУ-ын Инчён хотод арав дахь өдрөө үргэлжилж байна. Өнөөдөр Монголын баг тамирчдаас чөлөөт бөх, боксчдын тамирчид өрсөлдсөнөөс медалийн болзолыг нэг тамирчин хангалаа.

Боксын эрэгтэйчүүдийн 60 кг-ын жинд Д.Отгондалай Киргизстаны боксчин Аккол Сулайманбектэй учраа тааран 29:25, 29:26, 29:26-ын харьцаагаар гурван үеийн турш илүүрхэн ялалт байгуулснаар хүрэл медалийн болзол хангалаа. Д.Отгондалай мөнгөн медалийн төлөө Японы Сатоши Шимизүтэй аравдугаар сарын 2-нд тулалдана.

Харин 69 кг-д Б.Түвшинбат хүрэл медалийн төлөө Казахстаны боксчид ялагдсан бол 75 кг-д Н.Шинэбаяр Кувейтийн боксчинг ялснаар шөвгийн наймд шалгарлаа. Н.Шинэбаяр маргааш хүрэл медалийн төлөө Филиппиний боксчинтой тулалдана.

Чөлөөт бөхийн тэмцээн өнөөдөр өндөрлөж байна. Манай гурван бөх дэвжээнд гарснаас Т.Түвшинтулга, Ж.Чулуунбат нар хүрэл медалийн төлөө барилдсан ч ялагдлаа.

18.30 цаг.

Азийн наадмын арав дахь өдөр чөлөөт бөхийн тэмцээн өндөрлөж байна. Өнөдөөр манай гурван бөх дэвжээнд гарснаас 61 кг-ын жинд Олон улсын хэмжээний мастер Т.Түвшинтулга, 125 кг-ын жинд Олон улсын хэмжээний мастер Ж.Чулуунбат нар медалийн төлөө өрсөлдөхөөр шалгарсан.

61 кг-ын жингийн хүрэл медалийн төлөө Олон улсын хэмжээний мастер Т.Түвшинтулга Японы бөх Такацукатай барилдаж, 2:2 онооны харьцаагаар ялагдлаа. Нориюки Такацукагийн хувьд ДАШТ-ий хүрэл медальтай бөх юм.

Гэрэл зургийг Ч.ГАНБАТ.

16.40 цаг.

Өнөөдөр барилдсан манай бөхчүүдээс 61 кг-ын жинд барилдаж буй Олон улсын хэмжээний мастер Т.Түвшинтулга, 125 кг-ын жинд Олон улсын хэмжээний мастер Ж.Чулуунбат нар хүрэл медалийн төлөө барилдахаар шалгарлаа.

Шигшээ барилдаан Улаанбаатарын цагаар 18.00 цагаас эхэлнэ.

Т.Түвшинтулга Тажикстаны бөх Усмонзодаг ялж, хүрэл медалийн төлөө барилдахаар шалгарлаа.

Ж.Чулуунбат БНХАУ-ын бөхийг ялснаар хүрэл медалийн төлөө барилдахаар шалгарлаа.

Гэрэл зургийг Ч.ГАНБАТ.

14.00 цаг.

86 кг-ын жинд барилдаж буй олон улсын хэмжээний мастер П.Өсөхбаатар нэгдүгээр тойрогт Тайландын бөх Метее Тепакомтай таарч 11:0 онооны харьцаагаар хожлоо.

Гэрэл зургийг Ч.ГАНБАТ.

13.20 цаг.

125 кг-ын жинд барилдаж буй Олон улсын хэмжээний матер Ж.Чулуунбат нэгдүгээр тойрогт Арабын Нэгдсэн Эмират Улсын Мохаммед Салемтай барилдаж, 32 секундэд өрсөлдөгчөө цэвэр хожлоо.

13.18 цаг.

61 кг-ын жинд барилдаж буй Олон улсын хэмжээний мастер Т.Түвшинтулга нэгдүгээр тойрогт Энэтхэгийн бөх, ДАШТ-ний хүрэл медальт Баржангтай барилдаж, ялагдлаа. Т.Түвшинбат 5-5 онооны харьцаагаар тэнцсэн ч сүүлийн оноогоор ялагдав.

74 кг-ын жинд барилдаж буй олон улсын хэмжээний мастер Д.Гомбодорж нэгдүгээр тойрогт Өмнөд Солонгосын бөх Сангкю Литэй барилдаж, ялагдлаа.

Азийн зуны спортын XVII наадам БНСУ-ын Инчён хотод арав дахь өдрөө үргэлжилж байна. Чөлөөт бөхийн тэмцээний эрэгтэй 61, 74, 86, 125 кг-ын жингүүдийн барилдаан өнөөдөр болно.

61 кг-ын жинд олон улсын хэмжээний мастер Т.Түвшинтулга нэгдүгээр тойрогт энэтхэгийн бөх, ДАШТ-ний хүрэл медальт Баржангтай таарчээ.

Энэ жинд Ардчилсан Солонгос улсын бөх, Азийн аварга Рунг Хак Хванг, Ираны бөх, ДАШТ-ний хошой хүрэл, мөнгөн медальт, Азийн аварга Масуд Исмаельпур, Казахстаны бөх, ДАШТ-ний хүрэл медальт Даулет Ниязбеков, Японы бөх, японы бөх ДАШТ-ний хүрэл медальт Нориюки Такацука нарын шилдэг бөхчүүд байна.

74 кг-ын жинд олон улсын хэмжээний мастер Д.Гомбодорж нэгдүгээр тойрогт Өмнөд Солонгосын бөх Сангкю Литэй барилдана.

Энэ жинд Киргизийн бөх Иннокентий Иннокентьев, Ираны бөх Эззатоллах Акбаризаринколай, Узбекийн бөх ДАШТ-ний хүрэл медальт, азийн аварга Рашид Курбанов, Энэтхэгийн бөх Нарсингх Ядав нар байна.

86 кг-ын жинд олон улсын хэмжээний мастер П.Өсөхбаатар нэгдүгээр тойрогт Тайландын бөх Метее Тепакомтай таарчээ

Энэ жинд Ираны бөх, Азийн аварга Мейсем Муста Жукор, Узбекийн бөх Умижон Исманов, Энэтхэгийн бөх Пааван Кумар, Японы бөх Синая Мацумото нар байна.

125 кг-ын жинд олон улсын хэмжээний матер Ж.Чулуунбат нэгдүгээр тойрогт Арабын Нэгдсэн Эмират Улсын Мохаммед Салемтай таарчээ.

Энэ жинд казахстаны бөх Даулет Шабанбай, Ираны бөх, Азийн хошой аварга Парвиз Хади Басманж нарын шилдэг өрсөлдөгчид байна.

Азийн наадмын бусад төрлийн тэмцээнийг http://cricfree.tv-с үзнэ үү.

Азийн наадмын мэдээллийг Азийн наадам: Инчён-2014 цэсэнд ЭНД ДАРЖ авна уу.

Ч.БОЛОР