Азийн наадмын жүдо бөхийн тэмцээн өнөөдөр багийн төрлөөр өндөрлөнө. Монгол Улсын эрэгтэй, эмэгтэй шигшээ багийн тамирчид Азийн наадмын хүрэл медалийн төлөө барилдахаар шалгарлаа.

Эрэгтэй баг эхний тойрогт Туркменстаны багийг 5:0-ийн харьцаагаар ялсан ч мөнгөн медалийн төлөө тэмцээнийг зохион байгуулагч орны багтай барилдаж, 0:5-ын харьцаагаар ялагдлаа. Ингэснээр манай баг эхний тойрогт Узбекстаны багт 2:3-аар ялагдсан ч Саудын Арабыг 5:0-ын харьцаагаар ялсан Японы багтай Азийн наадмын хүрэл медалийн төлөө барилдах юм.

ДАШТ-ий мөнгөн медальт эмэгтэй баг эхний тойрогт Тайландын багийг 4:1-ийн харьцаагаар ялсан ч дэвжээний эзэн БНСУ-ын багт ялагдаж, хүрэл медалийн төлөө барилдахаар шалгарлаа. Мөнгөн медалийн төлөөх барилдаанд Гавьяат тамирчин М.Бундмаа эхний учраагаа ялж, гараагаа сайхан эхлүүлсэн ч Д.Сумъяа Жун Ён Жунд хоёр торгуулиар ялагдлаа. Ц.Цэрэнчимэд учраагаа цэвэр ялж, 2:1-ийн харьцаагаар манай баг тэргүүлж эхэлсэн ч Ц.Наранжаргал торгуулиар, Б.Мөнхтуяа юүкогоор ялагдаж, 2:3-ын харьцаагаар ялагдал хүлээлээ.

БНСУ-ын эрэгтэй, эмэгтэй багууд алтан медалийн төлөө шалгараад байна. Тэмцээнийг зохион байгуулж буй БНСУ Азийн наадамд томоохон ач холбогдлыг өгч энэ сарын эхээр өндөрлөсөн ДАШТ-д залуучуудын багаа илгээсэн билээ.

Багийн төрлийн эрэгтэй алтан медалийн төлөө БНСУ-Казахстан шалгарсан бол эмэгтэй шигшээ барилдаанд Япон-БНСУ-ын багууд шалгараад байна.

Эрэгтэй хүрлийн төлөө Монгол-Японы багууд шалгарсан. Манай эмэгтэй баг дагах барилдаанд гарч ирсэн хоёр багийн ялсантай нь барилдах юм.

Шигшээ барилдаан Улаанбаатарын цагаар 19.00 цагт эхэлнэ.

Гэрэл зургийг Д.ЖАВХЛАН

НЭМЭЛТ: 20.00 цаг

Багийн төрлийн хүрэл медалийн төлөө манай эрэгтэй, эмэгтэй баг шалгарсан ч өрсөлдөгчдөө ялагдсанаар IV байрт шалгарлаа. Эрэгтэй баг Японы багт 2:3, эмэгтэй баг БНХАУ-ын багт 2:3-ын харьцаагаар ялагдлаа. 

Жүдо бөхийн тэмцээн өнөөдөр өндөрлөж байна. Хэдийгээр багийн төрлөөс манай баг медаль хүртэж чадаагүй ч жүдо бөхийн шигшээ баг тамирчид Азийн наадмаас гурван алт, гурван мөнгө, дөрвөн хүрэл медаль, шагналт V байрт гурван бөх шалгарч Япон, БНСУ-ын ард гуравдугаар байрт шалгарлаа.

Алтан медаль:

• Олимпийн алт, мөнгөн медальт, Монгол Улсын Хөдөлмөрийн баатар, Гавьяат тамирчин Н.Түвшинбаяр,
• Дэлхийн залуучуудын аваргын хошой мөнгөн медальт Д.Төмөрхүлэг,
• Дэлхийн аварга, Гавьяат тамирчин М.Уранцэцэг

Мөнгөн медаль:

• Дэлхийн аварга Г.Болдбаатар
• ОУХМ Ө.Дүүрэнбаяр
• ОУХМ Г.Одбаяр

Хүрэл медаль:

• ОУХМ Л.Отгонбаатар
• ОУХМ Н.Дагвасүрэн
• ОУХМ Д.Сумъяа
• ОУХМ Ц.Наранжаргал нар тус тус хүртлээ.

Азийн наадмын бусад төрлийн тэмцээнийг http://cricfree.tv-с үзнэ үү.

Азийн наадмын мэдээллийг Азийн наадам: Инчён-2014 цэсэнд ЭНД ДАРЖ авна уу.

Ч.БОЛОР