Дөрвөн жилд нэг удаа зохиогддог буудлага спортын Дэлхийн аварга шалгаруулэх тэмцээн Испанийн Гранада хотноо тав дахь өдрөө үргэлжилж байна.

Энэ өдөр урт бууны эрэгтэйчүүд, залуучуудын гар бууны тамирчид болон гар бууны эмэгтэйчүүдийн галын шугамд онч сорино. Эмэгтэйчүүдийн хийн гар бууны 10 метрийн дасгалд Гавьяат тамирчин О.Гүндэгмаа, ОУХМ Ц.Мөнхзул, ОУХМ Т.Баярцэцэг нарын буучид өрсөлдөх юм. Энэ дасгалд эхний таван байр эзэлсэн тамирчид олимпийн эрхээ авах юм. Тэмцээний урьдчилсан буудлага Улаанбаатарын цагаар 15.00-17.25-д болж, шигшээ буудлага 20.00-20.30 цагийн хооронд болно.

50 метрийн гурван байрлалаас 60 сум буудах дасгалд ОУХМ Г.Нандинцэцэг, ОУХМ О.Янжинлхам, ОУХМ Ч.Нарантуяа нар буудна. Урьдчилсан буудлага 15.00-16.45 цагт, шигшээ буудлага 18.00-19.00 цагийн хооронд болох юм. Энэ дасгалд эхний зургаан байр эзэлсэн тамирчид олимпийн эрхээ авах юм.

Мөн 50 метрийн гурван байрлалаас 120 сум буудах эрэгтэйчүүдийн дасгалд ОУХМ Н.Баярмаа, ОУХМ Б.Бишрэл, ОУХМ Х.Бямбабаатар нар буудна. Урьдчилсан буудлага 17.30-23.45 цагийн хооронд болох бөгөөд шигшээ буудлага маргааш болно.

Дашрамд дурдахад, 51 дэх удаагийн ДАШТ-нд оролцож буй Монгол Улсын шигшээ багийн тамирчдаас спорт гар бууны 25 метр дасгалд Гавьяат тамирчин О.Гүндэгмаа, ОУХМ Ц.Мөнхзул, ОУХМ Т.Баярцэцэг нарын бүрэлдэхүүнтэй Монголын тамирчид багийн дүнгээр 1739 оноо авч, мөнгөн медаль хүртээд байна. Монголын мэргэн бууч бүсгүйчүүд 1998 онд яг энэ дасгалдаа дэлхийн аваргын хүрэл медаль хүртэж байсан юм.

Тэмцээний албан ёсны сайт: http://www.issf-sports.org

НЭМЭЛТ: 19.45 цаг.

Хийн гар бууны эмэгтэйчүүдийн дасгалд 114 буудагч буудсанаас

ОУХМ Т.Баярцэцэг 378 оноогоор 33 байр
МУГТ О.Гүндэгмаа 378 оноогоор 35 байр
ОУХМ Ц.Мөнхзул 377 оноогоор 45 байр эзэллээ.

Багийн дүнгээр нийт 22 багаас
1. Серб 1142
2.Хятад 1141
3.Унгар 1140 оноогоор
……10. Монгол 1133 оноогоор тус тус шалгарлаа.

50 метрт 3-н байдлаас 60 сум буудах эмэгтэйчүүдийн дасгалд нийт 62 буудагч буудсанаас

ОУХМ Ч.Нарантуяа 584 оноогоор 10 байр
ОУХМ О.Янжинлхам 575 оноогоор 50 байр
ОУХМ Г.Нандинзаяа 575 оноогоор 51 байр эзэллээ.

Залуучуудын дэлхийн аваргын 50 метрийн сонгомол гар бууны дасгалд спортын мастер О.Төгөлдөр финалд шалгарлаа.

Ч.БОЛ