Чөлөөт бөхийн Дэлхийн аварга шалгаруулах тэмцээн Узбекийн Ташкент хотноо эмэгтэйчүүдийн тэмцээнээр үргэлжиллээ.

Өнөөдөр эмэгтэйчүүдийн 53, 58, 75 кг жингийн барилдаан болж, медалтнууд тодорлоо. Эдгээр жинд барилдсан Монголын бөхчүүдээс 75 кг-ын жинд өрсөлдсөн ДАШТ-ий мөнгө, хүрэл медальт, Монгол Улсын Гавьяат тамирчин Очирбатын Бурмаа хүрэл медалийн төлөө  Колумбийн бөх А.Олаяг 3:0 харьцаагаар ялж, ДАШТ-с хоёр дахь хүрэл медалиа хүртлээ.

Түүний хувьд ийнхүү ДАШТ-ээс гурав дахь медалиа зүүгээд байна.

О.Бурмаагийн хувьд эхний тойрогтоо гоц мөргөж, хоёрдугаар тойрогт дэлхийн аваргын алт, хүрэл медальт, Европын хошой аварга Украины Катерина Бурмистроватай барилдаж, 5:0-ийн харьцаагаар ялснаар шөвгийн наймд шалгарсан. Улмаар дэлхийн тав, Европын зургаан удаагийн аварга Болгарын бөх Станка Златеватай барилдаж, 6:3-ийн харьцаагаар ялснаар шилдэг дөрөвт багтсан юм. О.Бурмаагийн хувьд энэ барилдаан маш хүнд болсон бөгөөд 1:3-аар ялагдаж яваад, сүүлийн 5 секундын өмнө 4 оноо авч ялсан юм.

Манай бөх мөнгөн медалийн төлөөх барилдаанд Бразилийн бөх Алинэ Да Силвад 2:5-ын харьцаагаар ялагдсанаар хүрэл медалийн төлөө өрсөлдөж, ийнхүү Монголын эмэгтэйчүүдийн энэ тэмцээнээс хүртэж буй хоёр дахь медалийг эх орондоо авчирлаа.

Бөхийн чөлөөт барилдааны ДАШТ-д оролцож буй Монголын шигшээ багийн тамирчид одоогоор нэг алт, гурван хүрэл медаль /Эрэгтэй, эмэгтэй нийт/ хүртээд байна.