Испаний шигшээ баг Францад хожигдлоо

-2014 оны Дэлхийн аварга шалгаруулах тэмцээний хагас шигшээд Франц-Серб, АНУ-Литва улсын багууд шалгарлаа.-

Испаний Мадрид, Барселина хотуудад болж буй 2014 оны сагсан бөмбөгийн Дэлхийн аварга шалгаруулах тэмцээний шөвгийн наймын тоглолтод тэмцээнийг зохион байгуулагч орны шигшээ баг Францын багт ялагдаж, V байрт шалгарсан амжилтыг үзүүллээ.

Шөвгийн наймын сүүлийн тоглолтууд өнгөрсөн шөнө болж Франц-Испанийг 65:52-оор, Серб-Бразилийг 84-56-ийн харьцаагаар хожиж, хагас шигшээд шалгарлаа. Лхагва гаригт шөвгийн наймын эхний тоглолтууд болсон бөгөөд АНУ, Литвийн багууд шалгараад байсан.

Дэлхийн аваргын хагас шигшээд Франц-Серб, АНУ-Литва улсын шигшээд багууд шалгарлаа. Мөнгөн медалийн төлөөх тоглолтууд өнөөдөр, маргааш буюу есдүгээр сарын 11, 12-ны өдрүүдэд болно.

09.11-нд Браселина хот: АНУ-Литва

09.12-нд Мадрид хот: Франц-Серб

Энэ удаагийн Дэлхийн аваргын томоохон сенсаацийг Францын сагсчид тарьлаа. Францын баг “А” хэсэгт Египет (94-55), Иран (81-76) улсын шигшээ багийг хожиж, Бразил (63-65), Серб (73-74), Испаний (63-82) багт хожигдсоноор хэсэгтээ гуравдугаар байрт шалгарсан. Гэхдээ францчууд Бразил, Сербид эцсийн мөчид хожигдсон бол Испанид 19 оноогоор ялагдал хүлээсэн. Францын шигшээ шөвгийн 16-д “В” хэсгийн гуравдугаар байраар шалгарсан Аргентиний багийг 85-65-ийн харьцаагаар хожиж, шөвгийн наймд шалгарсан юм. Хагас шигшээд тоглох эрхийн төлөө тэмцээнийг зохион байгуулагч Испаний багтай тоглож, 65-52-ийн харьцаагаар хожсоноор шилдэг дөрөвт шалгарлаа.

Францын шигшээ баг 1954 оны дэлхийн аваргад IV байрт шалгарч байсан нь хамгийн том амжилт аж. Тэд 2006 онд V, 2010 онд XIII байрт шалгарч байжээ. Баасан гаригт болох хагас шигшээ тоглолтод Сербийн багийг хожвол дэлхийн аваргын түүхэн амжилтаа үзүүлж, цаашлаад аваргын төлөө тоглох юм. Хэдийгээр дэлхийн аваргаас медаль хүртэж чадаагүй байгаа ч Францын шигшээ баг “Лондон-1948”, “Сидней-2000” олимпийн их наадмаас мөнгөн медаль хүртэж байжээ.