А.Басхүү ФИЛА-гийн &#34Алдрын танхим&#34-д өргөмжлөгдлөө

Бөхийн чөлөөт барилдааны насанд хүрэгчдийн эрэгтэйчүүдийн 44 дэх, эмэгтэйчүүдийн 25 дахь удаагийн Дэлхийн аварга шалгаруулах тэмцээн есдүгээр сарын 8-14-ний өдрүүдэд Узбекийн нийслэл Ташкент хотноо болох юм.

Олон улсын бөхийн төрлүүдийн нэгдсэн холбоо буюу ФИЛА-гийн "Алдрын танхим"-д бөхийн спортын алдартнуудыг залж өргөмжлөл ёслол ДАШТ-ий өмнө буюу өчигдөр Ташкент хот дахь Узбекийн олимпийн алдрын музейд боллоо.

Энэ ёслолд ФИЛА-гийн ерөнхийлөгч Н.Лалович, Товчооны гишүүд, ДАШТ-нд хүрэлцэн ирсэн шүүгчид, дасгалжуулагчид, бөхчүүд оролцлоо. Алдрын танхимд нэр нь орсон бөхийн спортын алдартнуудад батламж гардуулан өгсөн байна. ФИЛА-гийн Алдрын танхимын 12 жилийн ойд зориулсан алдартнуудын сонгон шалгаруулалтыг тус холбооны дэд ерөнхийлөгч Стан Дезикийн удирдсан тусгай зөвлөл зохион байгуулсан байна. Энэ оны алдартнуудын дотор 10 орны иргэд, түүний дотор олимпийн 11, ДАШТ-ий 25 алтан медаль хүртэгсэд багтсан байна.

Тэдэн дунд чөлөөт бөхийн нэрт шүүгч, олимпийн наадамд зургаан удаа, ДАШТ-д 30 удаа шүүгчээр ажилласан, 2006-2008 онд ФИЛА-гийн зааварлагч шүүгчээр ажиллаж байсан Монгол Улсын Гавьяат дасгалжуулагч, Ардын багш Адуучийн Басхүү Монголоос анх удаа “Алдрын танхим”-д өргөмжлөгдлөө.

ФИЛА-гийн Алдрын танхимын нэрээ мөнхөлсөн бөхийн спортын алдартнуудын нэрсийг дор толилуулж байна:

Дасгалжуулагчид:

Дмитрий Миндиашвили: /ОХУ, Красноярск хотод Бөхийн академийг үндэслэгч, олимпийн гурван удаагийн аварга Б.Сайтиев, олимпийн хошой аварга И.Ярыгин нарын дасгалжуулагч, ЗХУ болон ОХУ-ын үндэсний шигшээ багийн дасгалжуулагчаар 1970-2000 онд ажиллаж байсан/.

Вадим Псарёв: /Казахстан, олимпийн наадмын зургаан алт, хошой мөнгө, ДАШТ-ний 13 алтан медаль хүртсэн алдарт бөх В.Рязанцев, А.Быков, Ж.Ушкемпиров, А.Назаренко, В.Бакулин нарын дасгалжуулагч/

Шүүгчид:

Адуучийн Басхүү: /Монгол, 6 удаа олимпийн наадамд, 30 удаа ДАШТ-нд шүүгчээр ажилласан, 2006-2008 онуудад ФИЛА-гийн зааварлагч шүүгчээр ажиллаж байсан, 1988 оны Алтан шүгэл шагналт/

Эндер Бикурзэн: /Турк, Монгол, 6 удаа олимпийн наадамд, 26 удаа ДАШТ-нд шүүгчээр ажилласан, 1995-2012 онуудад ФИЛА-гийн зааварлагч шүүгчээр ажиллаж байсан. 1996 оны Алтан шүгэл шагнал/.

Эрэгтэй чөлөөт бөх:

Павел Пинигин: /ЗХУ, ОХУ, дэлхийн гурван удаагийн болон олимпийн аварга/

Бесик Кудухов: /ОХУ, олимпийн мөнгө, хүрэл, ДАШТ-ний дөрвөн алтан медальт/

Аслан Хадарцев: /ЗХУ, дэлхийн гурван удаагийн аварга/

Хадем Ашгади: /Иран, олимпийн наадмын алт, хүрэл, ДАШТ-ний хошой алтан медальт/

Сонгомол барилдаан:

Жашкалык Ушкемпиров: /ЗХУ, Казахстан, олимпийн болон дэлхийн аварга/

Михаэль Линдберг: /Швед, олимпийн алт, хүрэл, ДАШТ-ний хошой алтан медальт/

Сим Квон Ху: /БНСУ, олимпийн болон дэлхийн хошой аварга/

Эмэгтэй чөлөөт бөх:

Лиза Легран: /Франц, олимпийн хүрэл, ДАШТ-ний хошой алтан медальт /

Сара Эрикссон: /Швед, ДАШТ-ний мөнгө, гурван хүрэл, хошой алтан медальт/

Бөхийн спортын домог:

Вилфрид Дитрих: /ХБНГУ, чөлөөт бөхийн олимпийн наадмын хошой мөнгө, алт, хүрэл, сонгомол барилдааны олимпийн хүрэл, ДАШТ-ний алт, хошой мөнгө, хүрэл медальт/