-Эмэгтэй баг "D" хэсгийн аваргын төлөө Кубын бүсгүйчүүдтэй барилдана.-

 ОХУ-ын Челябинск хотод болж буй жүдо бөхийн Дэлхийн аварга шалгаруулах тэмцээн өнөөдөр багийн тэмцээнээр үргэлжилж байна.

Эрэгтэй, эмэгтэй тус бүр шилдэг 16 баг өрсөлдөж байгаагаас манай эрэгтэй баг "В" хэсэгт, эмэгтэй баг "D" хэсэгт өрсөлдөж буй. Эрэгтэй баг Японы хүчирхэг багт 0:5-ийн харьцаагаар ялагдсан бол эмэгтэй баг Казахстаны багийг 4:1-ийн харьцаагаар ялж, хэсгийн аваргын төлөө барилдахаар шалгарлаа. Эмэгтэйчүүдийн "D" хэсгийн аваргын төлөө Монгол-Кубын багууд шалгараад байна. Кубын бүсгүйчүүд БНХАУ-ын багийг 4:1-ийн харьцаагаар ялжээ.

Өнгөрсөн жил Бразилийн Рио де Жанейро хотноо болсон дэлхийн аваргын багийн төрөлд эмэгтэйчүүдийн хувьд эхний тойрогтоо Кубын багт 2:3-ийн харьцаатай ялагдаж, тэмцээнээ өндөрлүүлж байсан бол энэ жил хэсгийн аваргын төлөө барилдахаар шалгараад байна.