Монгол киноны 80 жилийн ойг угтан найруулагч О.Машбатын гэр бүлийнхэн нэгэн киног ард түмэндээ барих гэж байна. "Цэн тогоруу" кино зохиолыг М.Бишрэл, М.Ивээл нар бичиж, ерөнхий найруулагчаар М.Ивээл, найруулагчаар О.Машбат, ерөнхий продюссероор МУГЖ Н.Батцэцэг нар ажилласан байна.  Энэхүү кино ирэх есдүгээр сарын 12-нд кино театруудад нээлтээ хийх юм.

“Цэн тогоруу” киононы ерөнхий продюссероор ажилласан МУГЖ Нацагийн Батцэцэг: "Киногоо нээх өдөр ойртох тусам сэтгэл догдолж, бас бага зэрэг эмээж байна шүү. Ямартай ч үзэгчдийн таашаалд нийцсэн, сайн бүтээл болсон гэдэгт эргэлзэхгүй байгаа. Манай гэр бүлийнхэн олон жил АНУ-д ажиллаж, амьдарлаа. Хэдийгээр өндөр хөгжилтэй оронд байсан ч хүн нутагтаа л яардаг юм байна. Бидэнд нутагтаа ирээд кино хийх санаа маш их байсан. Тиймээс Бид монголынхоо аж байдал, нүүдэлчдийн уламжлалт амьдралын хэв маяг, хөдөө нутгийн байгалийн үзэсгэлэн, хөдөөгийн залууст тохиож буй бэрхшээл, тэдний хайр сэтгэл, амьдралын тухай өгүүлсэн кино хийхийг зорьсон хэрэг.  Энэхүү киноны нийт уран бүтээлчдийн 80 гаруй хувь нь 25 орчим насны залуус. Залуучуудын арга барил нь өөр юм. Ялангуяа жүжигчидтэйгээ ажиллаж байгаа нь биднийхээс тэс өөр. Тэднээс суралцах зүйл их байна. Киноны гол дүрд Э.Идэрболд, Б.Оюун-Эрдэнэ нарын шинэ, залуу жүжигчид тоглолоо. Киноны дууг П.Идэржавхлан гэж мөн л залуу дуучин дуулсан. Тиймээс 25-тнуудын уураг, тархиар бүтсэн киноноос арай өөр салхи сэвэлзэх болов уу гэж бодож байна."

Энэхүү кинонд бидний сайн мэдэх олон алдартай уран бүтээлчид ажилласан байна. Киноны баг Төрийн шагналт яруу найрагч Ц.Бавуудорж, авьяаслаг хөгжмийн зохиолч Ш.Өлзийбаяр, “Bro’s records" студийн Томоо буюу М.Болд, Make Up artist Л.Цэрэндулам нар ажиллажээ. Мөн Равсал панз дүрээрээ ард түмэндээ хоногшсон МУГЖ Б.Магсаржав, Ардын жүжигчин Д.Мэндбаяр, МУГЖ Н.Нэргүйбаатар, СТА Уухааны Батбаатар гээд дэлгэцийн шилдэг уран бүтээлчид "Цэн тогоруу" киног амилуулсан байна.

Та www.facebook.com/tsentogoruu фэйсбүүк хуудаст зочилж, тусгай бэлгүүдийг ч хүртэх боломжтой аж.

Хайр бол тэвчээр

Хайр бол өмөг түшиг

Хайр бол амласандаа хүрэх ….

Харин таныхаар …? Энэхүү асуултыг та "Цэн тогоруу" киног үзэхдээ хэлээрэй. Харин таныхаар …?

Ч.БОЛОР