Монголын хөлбөмбөгийн холбооны албан ёсны түнш “MCS Coca Cola ХХК”-тай хамтран зохион байгуулдаг идэрчүүдийн U-15, U-17 насны “Хүслийн Лиг 2014” тэмцээн наймдугаар сарын 4-нд эхэлсэн. Тэмцээний 15 хүртэлх насанд найман баг, 17 хүртэлх насанд таван баг өрсөлдөж байна. Тэмцээн энэ сарын 4-29-ныг хүртэл МХБХ-ны цэнгэлдэх хүрээлэнд явагдаж, аваргуудаа тодруулна. 15 насанд өрсөлдөж байгаа найман баг нэг тойрог өрсөлдсөний эцэст өндөр үзүүлэлттэй хоёр нь алт, удаах хоёр нь хүрэл медалийн төлөө тоглох юм. Харин 17 насны таван баг хоёр тойрог өрсөлдөж, дүнгээр нь байр эзлүүлэх аж.

Тэмцээний мэдээллийг хүргэж байна.

15 хүртэлх насны ангилал:

Тоглолт №11

ХОРОМХОН 1:3 ШИНЭ ЯАРМАГ

Онооны жагсаалтаар 4, 5-р байрт бичигдэж буй “Хоромхон” – “Шинэ Яармаг” багууд өрсөлдлөө. Тоглолтын эхнээс л  “Хоромхон”  багийнхан эрчимтэй довтолж байлаа. Гэсэн хэдий ч өрсөлдөгчийнхөө хаалга руу чиглэсэн довтолгоо бүр нь гоол болохгүй байсан нь “Шинэ Яармаг” багийн хаалгач гайхалтай хаалтуудыг хийж байсных юм. Харин 12 дахь минутад “Хоромхон” багийн Б.Очирзаяа гоол оруулж, тоглолтыг  тэргүүлж эхэллээ. Эхний хагасын шүгэл дуугарахаас ердөө 4 минутын өмнө “Шинэ Яармаг” багаас Б.Оюунтөгс гоолдож тооны харьцааг тэнцүүлсэн бол сүүлийн хагасын 37 ба 38 дахь минутад “Шинэ Яармаг” багийн О.Гантиг дараалан 2 гоол хийж, багтаа ялалт авчирлаа.

Тоглолт №12

ХАРААЦАЙ 2:2 МОНГОЛЫН ТЭМҮҮЛЭЛ  

Тоглолт эхлээд 5-хан минут өнгөрч байхад  “Хараацай” баг Н.Батхолбоогийн гоолоор тэргүүлж эхэллээ. Үүний дараа 25 дахь минутад Г.Дөлгөөн 2 дахь гоолоор өрсөлдөгчийнхөө хаалгыг мялааж, эхний хагас “Хараацай” багийн давамгайлал дор завсарлалаа. Гэвч 2-р үеийн сүүлийн 6 минутад буюу 52 ба 54 дэх минутад М.Амарбат, Б.Баярбилэгт нар тус тус гоол оруулж, тооны харьцааг тэнцүүлж, 2 баг тус бүр 1 оноо авлаа.

17 хүртэлх насны ангилал:

Тоглолт №6

АРВИС 1:4 МОНГОЛЫН ТЭМҮҮЛЭЛ

Идэрчүүдийн “Хүслийн лиг-2014” тэмцээний 17 хүртэлх насны ангиллын 6 дахь тоглолт “Арвис”- “Монголын Тэмүүлэл” багуудын тоглолтоор эхэллээ. “Арвис” багийн хувьд 1 хожил, 1 хожигдолтой байгаа бол “Монголын Тэмүүлэл” баг 2 хожилтой байв. Тоглолтын эхний гоолыг “Арвис” багаас Э.Өлзийтөмөр оруулж тэргүүлж эхэллээ. Тоглолтын хувь заяа эхний үед “Арвис”-ын талд шийдэгдсэн гэхээр байсан боловч, 2-р хагасаас “Монголын Тэмүүлэл” баг тоглолтын санаачилгыг гартаа авч, Б.Бат-Эрдэнэ 52’, Т.Ууганбаяр 65’, Л.Намбарнанзад 70’, Д.Тэмүүлэн 71’нар тус тус гоол хийж, 4:1 харьцаагаар “Монголын Тэмүүлэл” баг ялалт байгуулж, хожлын 3 оноог итгэл төгс авлаа. Ийнхүү тэд нийт 9 оноогоор хүснэгтийг тэргүүлж байна.