Лондоны “Арсенал” “Дортмундын “Борусси” багийн хамгаалагч Матс Хуммельсын төлөөх тэмцэлд нэгджээ. Герман хамгаалагчийг “Их буучид”-аас гадна Лут Ван Гаалаар удирдуулсан “Манчестер Юнайтед” эгнээндээ нэгтгэхийг хичээж байгаа юм.

“Арсенал” төвийн хамгаалагч Томас Вермаленаа “Барселона”-д зарсныхаа дараа орыг нь эзлэх сайн тоглогчийн эрэлд гарсан. А.Венгерийн сонголт эцэстээ герман хамгаалагч дээр тогтсон байна. Хэвлэлд бичиж байгаагаар бол Дортмундын маг Матсыг дор хаяж 25 сая еврогоор зарах бодолтой байгаа гэнэ.

Матсыг авахаар хөөцөлдөж байгаа нөгөө баг “Манчестер Юнайтед” хэрвээ оролдлого нь бүтэлгүйтвэл “Аякс”-ын Дали Блиндийг авах санаатай байгаа ажээ. Түүний зах зээлийн үнэ 17 сая еврогоор хэмжигдэж байгаа юм.

Эх сурвалж: www.mminfo.mn