2014 оны залуучуудын ДАШТ Хорват улсын Загреб хотын “Dow Sportova” спортын ордонд үргэлжилж байна.

Тэмцээний дөрөв дэх өдөр эмэгтэй чөлөөт бөхийн 48, 55, 63, 72 кг-ын жингүүдийн барилдаан болж манай дөрвөн бөх зодоглосноос 55 кг-ын жинд барилдсан А.Батцэцэг хийморьлог, өөртөө итгэлтэй, гарамгай сайн барилдаж бүх өрсөлдөгчдөө илүүрхэн ялж залуучуудын дэлхийн аварга гэдэг хүндтэй цолыг хүртлээ.  Дэлхийн залуучуудын аварга гэдэг цолыг хүртсэн монголын 7 дахь, бүсгүйчүүдийн хувьд 3 дахь бөх болов. Азийн өсвөрийн болон залуучуудын аварга, дэлхийн залуучуудын аварга цолыг дараалан хүртээд байгаа А.Батцэцэгтээ цол чимгээ улам баяжуулж багш дасгалжуулагч нараа түүний дотор Цэндийн Баярсайхан багшаа, бөх сонирхогчдоо олон сайхан гялалзсан амжилтаар баярлуулсаар байхыг хүсэн ерөөж байна.

А.Батцэцэг нь “Хасу-Мегастарс” клубын дасгалжуулагч Ц.Баярсайханы шавь нараас төрсөн хоёр дахь дэлхийн залуучуудын аварга бөх болж байна. Өмнө нь 2007 онд олон улсын хэмжээний мастер Т.Даваахуяг БХНАУ-ын Бээжин хотод дэлхийн залуучуудын аварга болж байсан юм.

Тэрчлэн 63 кг-ын жинд барилдсан Б.Нямгэрэл өсвөрийн ДАШТ-ний хошой хүрэл, азийн залуучуудын аварга шалгаруулах тэмцээний мөнгө, азийн өсвөр үеийн аварга шалгаруулах тэмцээний хүрэл медалиа мөн хүрэл медалиар арвижууллаа. Мөнгөн медалийн төлөө барилдаанд бүх өрсөлдөгчдөө цэвэр ялж аварга болсон оросын бөх Любовь Овчаровад аргагүй дийлдсэн ч хүрэл медалийн төлөө барилдаанд азербайжаны бөхийг цэвэр дарсан.

48 кг-ын жинд өрсөлдсөн Ц.Намуунцэцэг эхний барилдаануудаа сайн хийсэн ч хүрэл медалийн төлөө барилдаанд энэтхэгийн бөхийг барсангүй.

Манай эмэгтэй баг өнгөрсөн жил хүрэл цом хүртсэн амжилтаасаа ухарч зургаадугаар байранд орсондоо зохих дүгнэлтийг хийх биз ээ.

Японы эмэгтэй бөхчүүд мөн л гялалзаж 4 алт, 2 хүрэл медалиар тасархай түрүүлж удаахь байрт 2 алт, тус бүр 1 мөнгө, хүрэл хүртсэн оросын баг оржээ. Нөгөө нэг алтан медалийг азербайжаны бөх авчээ.

Өнөөдөр эрэгтэй чөлөөт бөхийн 55, 66, 84, 120 жингүүдийн барилдаан болно. Манай 3 бөх дэвжээнд гарна.

Эмэгтэй чөлөөт бөх

44 кг

1. Харука Учижо /Япон/

2. Риту Фогат /Энэтхэг/

3. Мария Дои /АНУ/

3. Миглан Селишка /Болгар/

11. Лхагвагийн Баттогтох /Налайх дүүрэг/

Энэ жинд 15 бөх барилдсанаас Л.Баттогтох нэгдүгээр тойрогт туркийн бөх Гормус Бусрад 7:9 онооны харьцаагаар дийлджээ.

48 кг 

1. Ю Мияхара /Япон/

2. Я Кси /БНХАУ/

3. Милана Дадашева /ОХУ/

3. Мамта Мамта /Энэтхэг/

5. Цогт-Очирын Намуунцэцэг /Дархан-Уул аймаг, “Хасу-Мегастарс клуб/

Энэ жинд 25 бөх барилдсанаас Ц.Намуунцэцэг нэгдүгээр тойрогт азербайжаны бөх Мурадаже Шафагийг, хоёрдугаар тойрогт канадын бөх Анние Монтейтийг дараалан цэвэр дарж гуравдугаар тойрогт хятадын бөх Я Ксид цэвэр ялагдаж дагах барилдаанд польшийн бөх Пауль Козловыг 6:0, 4:0 онооны харьцаагаар хожиж хүрэл медалийн төлөө энэтхэгийн бөх Мамтатай өрсөлдөж 1:11 онооны харьцаагаар хожигджээ.

51 кг

1. Наталья Малышева /ОХУ, европийн залуучуудын аварга/

2. Мерседес Денес /Унгар/

3. Ингфен Кин /БНХАУ/

3. Лиля Хоришна /Украин/

21. Батбаатарын Мөнхтуяа /Дархан-Уул аймаг, “Хасу-Мегастарс клуб/

Энэ жинд 21 бөх барилдсанаас Б.Мөнхтуяа нэгдүгээр тойрогт хятадын бөх Ингфенг Кинд 0:6, 0:4 онооны харьцаагаар дийлджээ.

55 кг 

1. Алтанцэцэгийн Батцэцэг /Дархан-Уул аймаг, “Хасу-Мегастарс клуб, азийн залуучуудын аварга/

2. Татьяана Кит /Украин/

3. Солмах Хашизаме /Азербайжан/

3. Нанами Ирие /Япон, өсвөрийн дэлхийн аварга/

Энэ жинд 20 бөх барилдсанаас А.Батцэцэг нэгдүгээр тойрогт хийлж хоёрдугаар тойрогт хятадын бөх Хьюжинг Вангийг, гуравдугаар тойрогт германы бөх Женни Сенжерийг цэвэр ялж мөнгөн медалийн төлөө барилдаанд японы бөх Нанами Ириег 8:3 онооны харьцаагаар ялж алтан медалийн төлөө украиний бөх Татьяна Киттэй өрсөлдөж 10:0 онооны харьцаагаар өвдөг шороодуулжээ.

59 кг

1. Рисако Кавай /Япон, залуучуудын дэлхийн хошой аварга/

2. Луиза Немеш /ХБНГУ/

3. Каяла Миракль /АНУ/

3. Петра Олли /Финланд/

Энэ жинд 22 бөх өрсөлджээ.

63 кг

1. Любовь Овчарова /ОХУ/

2. Екатерина Ларионова /Казахстан/

3. Бүрнээбаатарын Нямгэрэл /Орхон аймаг, “Хангарьд” клуб/

3. Кива Сакае /Япон/

Энэ жинд 21 бөх барилдсанаас Б.Нямгэрэл нэгдүгээр тойрогт хийлж хоёрдугаар тойрогт беларуссын бөх Лаура Чарашилийг 4:4, 7:0, гуравдугаар тойрогт америкийн бөх Алексис Портерийг 7:3 онооны харьцаагаар хожиж мөнгөн медалийн төлөө барилдаанд оросын бөх Любовь Овчаровад цэвэр ялагдаж хүрэл медалийн төлөө Эльмира Гамбароваг цэвэр ялжээ.

67 кг

1. Масако Фуручи /Япон/

2. Далма Канева /Итали, европийн залуучуудын аварга/

3. Дануте Домикайтыте /Литов/

3. Рагнета Гурбанзаде /Азербайжан/

12. Отгонбатын Оюунгэрэл /Дархан-Уул аймаг, “Хасу-Мегастарс” клуб/

Энэ жинд 20 бөх барилдсанаас О.Оюунгэрэл нэгдүгээр тойрогт хийлж хоёрдугаар тойрогт канадын Лорена Эллисийг 4:1 онооны харьцаагаар ялж хоёрдугаар тойрогт италийн бөх Далма Каневад, дагах барилдаанд литовын бөх Дануте Домикайтытед цэвэр ялагджээ.

72 кг

1. Сабира Алиева /Азербайжан/

2. Анжела Катаева /ОХУ, европийн залуучуудын аварга/

3. Виктория Фрэнсис /АНУ/

3. Жамила Бакбергенова /Казахстан/

9. Пүрвээгийн Номин-Эрдэнэ /Өмнөговь аймаг/

Энэ жинд 18 бөх барилдсанаас П.Номин-Эрдэнэ нэгдүгээр тойрогт украиний бөх Анастасия Шустоваг 4:1 онооны харьцаагаар ялж казахстаны бөх Жамила Бакбергеновад 0:6, 0:4 онооны харьцаагаар хожигджээ.

Багийн дүн

Нэгдүгээр байр – Япон, 57

Хоёрдугаар байр – ОХУ, 45

Гуравдугаар байр – Азербайжан, 33

Зургаадугаар байр – Монгол, 26 оноо

МЧБХ Д.Өлгийсайхан