Мэргэжлийн талбайн теннисний эрэгтэй болон эмэгтэйчүүдийн цуврал тэмцээн Канадын Торонто, Монтреаль хотуудад болж байна.

Оны турш болдог эрэгтэйчүүдийн ATP World Tour Masters 1000 ангилалын есөн цувралын зургаа дахь нь болох “Rogers Cup” Торонто хотод болж байна. Тус тэмцээнд дэлхийн топ арван теннисдээс Сербийн Новак Жокович, Швейцарийн Рожер Федерер(3), Стан Вавринка(4), Чехийн Томаш Бердыш(5), Испаний Дэвид Феррер (6) нарын шилдгүүд оролцож байна. Тэмцээнийг өнгөрсөн жилийн аварга Испаний Рафаэль Надаль, дэлхийн чансааны 11-т бичигдэж буй Японы Кей Нишикори нар өнжөөд байна.

Харин Монтреаль хотноо болж буй WTA Premier 5 ангилалд багтах “Rogers Cup” тэмцээнд дэлхийн манлай теннисчин хэргэмийг 200 долоо хоног тэргүүлж буй АНУ-ын Серена Уильямс, өнгөрсөн сард “Уимблдон”-д түрүүлсэн Чехийн Петра Квитова, ОХУ-ын Мария Шарапова нарын шилдгүүд өрсөлдөж байна. Тэмцээнийг дэлхийн чансааны хоёр, гуравт бичигдэж буй БНХАУ-ын Ли На, Румыны Симона Халеп нар өнжөөд байна.

Топ арван теннисчдийн хувьд хоёрдугаар тойргоос тэмцээнийг эхлүүлсэн бөгөөд одоогоор Швейцарийн Рожер Федерер, Стан Вавринка нар өрсөлдөгчөө хожиж, гуравдугаар тойрогт шалгараад байна.

Эмэгтэйчүүдийн хувьд хоёрдугаар тойргоос тоглолтоо эхэлсэн гуравт эрэмбэтэй Польшийн Агнешка Радваньска, Беларусын Виктория Азаренка (8) нар гуравдугаар тойрогт шалгараад байна. Харин тэмцээнд тавд эрэмбэлэгдсэн Канадын залуу од Эжени Бучард хоёрдугаар тойрогт АНУ-ын Шелби Рожерст 0:6, 6:2, 0:6-аар ялагдаж тэмцээнийг орхиод байна.

Ганцаарчилсан болон хосын төрлөөр явагдаж буй “Rogers Cup” тэмцээн ирэх ням гаригт буюу наймдугаар сарын 10-нд өндөрлөнө.

Ч.БОЛ