Монгол Улсын Шадар сайд Д.Тэрбишдагва БНХАУ-ын Худалдааны яамны Азийн газрын дэд захирал, Засгийн газар хоорондын комиссын ажлын хэсгийн Хятадын талын дарга Сун Яомин тэргүүтэй төлөөлөгчдийг хүлээн авч уулзлаа.

Уулзалтын эхэнд Монгол-Хятадын ЗГХК-ын Монголын хэсгийн дарга, Шадар сайд хоёр орны худалдаа, эдийн засгийн хамтын ажиллагааг өргөжүүлэн хөгжүүлэхэд олон жил хувь нэмрээ оруулж Монгол Улсын талаар өргөн мэдлэгтэй явдагт талархал илэрхийлсэн. Мөн хоёр улсын худалдаа, эдийн засгийн хамтын ажиллагааг хөгжүүлэх дунд хугацааны хөтөлбөр байгуулахад идэвхтэй ажиллаж, ирэх сард болох өндөр дээд түвшний айлчлалаар эцэслэн байгуулахаар тохиролцсонд талархаж, энэ баримт бичиг нь эдийн засгийн харилцааг өргөжүүлэхэд чухал үүрэгтэй гэдгийг онцолсон юм.  

Хятадын шинэ удирдагч Ши Жиньпиний айлчлалын өмнө цаг зав гарган хүлээн авч уулзсанд ноён Сун Яомин талархал илэрхийлээд, Шадар сайдад Хятадын төрийн зөвлөлийн гишүүн Ян Жечиний мэндчилгээг уламжилсан юм. Мөн Хятадын талаас уул уурхай, дэд бүтцийн салбарт нэр төртэй компаниудаа оруулж, томоохон төсөлд хамтарч оролцоход дэмжлэг үзүүлэхийн зэрэгцээ Таван толгой, Оюу толгой төсөлд оролцох сонирхолтой байгаагаа илэрхийлсэн. Дашрамд сонирхуулахад, өнгөрсөн оны сүүлчээр Хятад-Монголын худалдааны хэмжээ 5,96 тэрбум ам.долларт хүрсэн аж. 

Мөн энэ өдөр Монгол-Оросын ЗГХК-ын Монголын хэсгийн дарга, Шадар сайд Д.Тэрбишдагва  ОХУ-аас Монгол Улсад суугаа Онц бөгөөд Бүрэн Эрхт Элчин сайд И.К.Азизовыг хүлээн авч уулзаж, ирэх есдүгээр сард манай улсад айлчлах ОХУ-ын Ерөнхийлөгч В.Путины айлчлалтын холбоотой асуудлаар ярилцсан байна.

Эх сурвалж: zasag.mn