Өнгөрөгч даваа гаригт буюу долдугаар сарын 28-нд АНУ-ын Калифорн мужийн Станфорд хотод эхэлсэн WTA-н ангилалын Bank of the West Classiс тэмцээний үеэр нэгэн шинэ амжилт бичигдлээ.

43 дахь удаагийн Bank of the West Classiс тэмцээнд топ арван теннисчдээс дэлхийн манлай теннисчин АНУ-ын Серена Уильямс, Польшийн Агнешка Радваньска, Германы Анжилья Кербер, Беларусын Виктория Азаренка нарын шилдэг теннисчид оролцож байна.

Тэмцээний эхний тойрогт тавд эрэмбэлэгдсэн Сербийн Анна Иваннович, Германы Сабине Лициски нар оноолт таарсан бөгөөд тус тоглолтын үеэр давуулалтын шинэ амжилт бичигдлээ. Лициски 210.8 км/цагийн хурдтай (131MPH) давуулалтыг гүйцэтгэж 2007 онд АНУ-ын Винус Уильямсийн тогтоож байсан 207.6 км/цагийн хурдыг (129MPH) шинэчилсэн байна.

Өчигдөр болсон тус тоглолтод Ана Иваннович 7:6, 6:1-ийн харьцаагаар өрсөлдөгчөө хожсоноор шөвгийн 16-д шалгарлаа. Тэмцээний өнгөрсөн жилийн аварга Словакийн Доминика Цибулкова эхний тойрогт Испаний Мугурузад ялагджээ.

Нийт 644 мянган ам.долларын шагналын сантай Bank of the West Classiс тэмцээний ганцаарчилсан болон хосын төрлийн аваргууд ирэн ням гаригт буюу наймдугаар сарын 2-нд тодорно.

Ч.БОЛ