Нидерландын Неймегон хотноо болж буй 100 буудалт даамын "А" ангилалын олон улсын тэмцээнд манай улсын тамирчид оролцож байна. Энэ сарын 21-нд эхэлсэн "Nijmegen Open 2014" тэмцээнд Монгол Улсын гурван тамирчин оролцож байгаагаас найман өргийн дараах байдлаар 2007 оны улсын аварга, дэлхийн даамын холбооны мастер Р.Манлай(1333) 11 оноогоор (таван хожил, нэг тэнцээ, хоёр хожигдолтой) 12-р байрт, дэд мастер М.Шийрэвжамц(1032) 8 оноогоор (2+4+2) 62-р байрт, Ази тивийн аварга, эмэгтэйчүүдийн их мастер М.Нямжаргал (1050) 7 оноогоор (3+1+4) 87-р байрт бичигдэж байна.

1985 оноос эхтэй "Nijmegen Open 2014" тэмцээнд 114 даамчин оролцож байгаа бөгөөд тэмцээн ирэх ням гаригт буюу долдугаар сарын 26-нд өндөрлөнө.

Манай тамирчдын хувьд энэ сарын 12-19-ний өдрүүдэд Нидерландын Херхюговард хотноо болсон 22 орны 191 даамчин (үүнээс 35 нь их мастер цолтон) оролцсон "Heerhugowaard Open -2014" тэмцээнд оролцсон. Тус тэмцээнд 2007 оны улсын аварга, дэлхийн даамын холбооны мастер Р.Манлай ("Масс" агентлаг) 11 оноогоор 45-р байр эзэлсэн бол Ази тивийн аварга, их мастер М.Нямжаргал ("Говь хангай" мебель) найман оноогоор 126-р байр, улсын аварга, эмэгтэйчүүдийн улсын анхны аварга, спортын мастер Д.Энхтуул найман оноогоор 142-р байр, өсвөрийн улсын олон удаагийн аварга, дэд мастер М.Шийрэвжамц (HBЦ) 169-р байрт шалгарсан.

Ч.БОЛОР