Энэ сарын 12-19-ний өдрүүдэд даамын өлгий нутаг Нидерландад зуун буудалт даамын олон улсын нээлттэй тэмцээн боллоо. Нидерландын Херхюговард хотод болсон "Heerhugowaard Open -2014" тэмцээнд дэлхийн 22 орны 191 даамчин (35 их мастер цолтой) оролцжээ. Тус тэмцээнд Монгол Улсаас дөрвөн тамирчин оролцсоноос 2007 оны улсын аварга, дэлхийн даамын холбооны мастер Р.Манлай 11 оноогоор 45-р байр эзэлсэн байна. Мөн Ази тивийн аварга, их мастер М.Нямжаргал ("Говь хангай" мебель) найман оноогоор 126-р байр, улсын аварга, эмэгтэйчүүдийн улсын анхны аварга, спортын мастер Д.Энхтуул найман оноогоор 142-р байр, өсвөрийн улсын олон удаагийн аварга, дэд мастер М.Шийрэвжамц (HBЦ) 169-р байрт шалгарчээ.

Мөн тэмцээний дундуур болсон хос тоглолтын тэмцээнд дэд мастер М.Шийрэвжамц Нидерландын Морис Коопманшаптай хамтран ангилалдаа хоёрдугаар байр эзэлсэн байна. Манай тамирчид үргэлжлүүлээд Неймеген хотноо нээлттэй тэмцээнд оролцож байна.

Ч.БОЛОР