Японы мэргэжлийн сүмогийн долдугаар сарын тэмцээний Нагоя башёгийн зургаа дахь өдрийн барилдаан өндөрлөлөө. Их аварга Хакүхо энэ өдөр Кайсэйг, озэки Котошёогикү Аминишикиг давснаар зургаа дахь даваагаа авлаа. Какүрюү М.Ананд Хоомашёотой барилдалгүй даваа авсан бол Харүмафүжи Д.Бямбадорж Оосүнаарашид ялагдлаа. Египетийн Оосүнаараши өчигдөр 71 дэх аварга Какүрюү М.Анандыг, өнөөдөр 70 дахь аварга Харүмафүжи Д.Бямбадоржийг давснаар дөрвөн даваа, хоёр унаатай башёг үргэлжлүүлж байна. Маэгаширгийн гуравт бичигдсэн Египетийн Оосүнаараши Лалын ертөнцийн мацаг барих Рамадан сар нь болсон тул нар жаргатал хоол идэлгүй, ус уулгүй барилдаанаа үргэлжлүүлж байна.

Зургаан өдрийн дараах байдлаар Их аварга Хакүхо, озэки Котошёогикү, маэгашира Таяасү нар зургаан даваатай башёг тэргүүлж байна.

Жюүрёод Ичиножёо А.Ичинноров Асасэкирюү Б.Дашнямыг давснаар зургаа даваатай ганцаараа тэргүүлж эхэллээ. Түүний араас Таканоива А.Баасандорж, Хомарэфүжи, Тосаюүтака нарын гурван бөх таван даваа, нэг унаатай удаалж байна.

Ч.БОЛ