Монголын шатарчдын дундаас өнөөг хүртэл Б.Мөнгөнтуул, Т.Батчимэг гэсэн хоёрхон эмэгтэй Их мастер төржээ. Одоогоос долоон жилийн өмнө Т.Батчимэг Монголын хоёр дахь эмэгтэй Их мастерын болзол хангаж байсан бол гурав дахь эмэгтэй их мастер цолтон долдугаар сарын эхээр тодорлоо.

Монголын долоо, эмэгтэйчүүдийн гурав дахь их мастер А.Энхтуул болон түүний багш Ц.Батболд, Гавьяат дасгалжуулагч П.Жигжидсүрэн нар өнөөдөр мэдээлэл хийж, Их мастерын болзол хангасан балл, саяхан оролцоод ирсэн Азийн залуучуудын шилдэг эмэгтэй шатарчдын өндөржүүлсэн бэлтгэл, рапидын олон улсын тэмцээний талаар мэдээлэл хийлээ.

Есөн настайгаасаа эхлэн оюуны спортоор хичээллэсэн А.Энхтуулыг 2006 онд Чехийн Пардувиц хотноо зохиогдсон Сурагчдын Дэлхийн аварга /Багийн/ шалгаруулах тэмцээнд түрүүлж, Монгол Улсаас анх удаа оюуны спортын төрөлд Дэлхийн аварга болж байснаар нь олон нийт сайн таних биз ээ.

Тэрээр Дэлхийн шатрын холбооны эмэгтэй их мастерын анхны норм биелүүлэхдээ 2013 оны есдүгээр сард Украинд зохиогдсон “Алушта 2013” олон улсын шатрын фестивальд оролцон, тав хожиж, дөрөв тэнцэн, нэг хожигдолж, 7,0 оноогоор хангажээ. Дараа нь 2013 оны арванхоёрдугаар сард ОХУ-ын Москва хотноо болсон тойргийн тэмцээнд хоёр дахь нормоо биелүүлсэн байна. Ингээд 2014 оны хоёрдугаар сард Москва хотноо болсон Зүүн бүсийн шатрын холбооноос зохион байгуулсан олон улсын тойргийн тэмцээнд Их мастер цолны гурав дахь нормоо биелүүлж, сүүлийн даваагаа давжээ.

Ингээд А.Энхтуул Их мастерын гурван баллтай болж, рейтинг нь 2300 хүрсэн тул Дэлхийн шатрын холбооноос түүнийг Их мастер цол хүртсэнийг 2014 оны долдугаар сарын 1-ний өдөр баталгаажуулан зарласан байна. Тэрээр ирэх наймдугаар сарын 14-нд Норвегийн Тромсо хотод болох ФИДЕ-гийн конгрессын үеэр энэхүү нэр хүндтэй цол, тэмдгээ гардан авах юм.

2006 он. Сурагчдын дэлхийн аварга болсны дараа.

Өдгөө Москва хотод суралцаж байгаа Их мастер А.Энхтуул баяр наадмын өмнөхөн Монголд ирсэн бөгөөд үүний өмнө долдугаар сарын 02-07-ны өдрүүдэд Вьетнамд болсон Азийн залуучуудын шилдэг 10 эмэгтэй шатарчны нэгдсэн бэлтгэл, рапидын тэмцээнд оролцсон байна. Их мастер, Дэлхийн аварга Сузан Полгарын санаачилсан “Chess for girls asia” рапидын олон улсын тэмцээнийг Энэтхэгийн Их мастер тэргүүлж, А.Энхтуул гуравдугаар байр эзэлжээ.

А.Энхтуул Их мастер цолны болзол хангах тууштай зорилго тавин хичээллэх хугацаандаа нийт 41 тэмцээнд оролцсон байна.

Б.ЭНХ