Хөлбөмбөгийн Дэлхийн аварга шалгаруулах 20 дахь удаагийн тэмцээн Бразил улсад зургаадугаар сарын 12-наас долдугаар сарын 13-ны хооронд болж, өнгөрлөө. Дэлхийн шилдгийн шилдэг 32 баг өрсөлдсөн тус тэмцээний аваргаар Германы шигшээ баг шалгарч, аргентинчууд мөнгөн медаль хүртэж, Нидерландын баг хүрэл медалийн эзэн болсон. Харин тэмцээнийг зохион байгуулагч Бразил улсын шигшээ баг дөрөвдүгээр байрт шалгарсан амжилтыг үзүүллээ.

Германы шигшээ багийн хаалгач Мануэль Нойер шилдэг хаалгачаар, Аргентиний довтлогч Лионель Месси шилдэг хөлбөмбөгчийн шагнал болох "Алтан шаахай"-г хүртсэн. 6 гоол оруулсан амжилтаар Колумбын Хамес Ходригес дэлхийн аваргын мэргэн буучаар шалгарлаа.

 Ийнхүү энэхүү дэлхийн аварга "Герман машин"-ууд илүү гэдгээ харуулж, дэлхийн аваргын цомыг хүртлээ. Германы шигшээ баг G хэсэгт Португаль, АНУ-ыг хожиж, Ганатай тэнцээ хийснээр хэсгээ тэргүүлсэн. Улмаар хасагдах шатны шөвгийн 16-д Алжирийг 2:1-ээр, шөвгийн наймд 1998 оны дэлхийн аварга Францыг 1:0-ийн харьцаагаар хожиж, хагас шигшээд шалгарлаа. Тэдний хувьд мөнгөн медалийн төлөөх тоглолтод тэмцээнийг зохион байгуулагч дэлхийн таван удаагийн аварга Бразилийн шигшээ баг хүлээж байсан. Гэвч энэхүү тоглолтод "Герман машин" 7:1-ээр өрсөлдөгч багаа олон сая хөгжөөн дэмжигчдийнх нь өмнө буулган авсан юм. Мөнгөн медалийн болзол хангаж, алтын төлөө тоглохоор шалгарсан Германы хөлбөмбөгчид шигшээд 1:0-ийн харьцаагаар Аргентиний багийг хожиж, дэлхийн аваргын дөрөв дэх түрүүгээ хүртэж байна.

Энэхүү дэлхийн аваргад дэлхийн таван удаагийн аварга Бразилийн шигшээ баг медальгүй хоцорсон бол Герман, Аргентин, Нидерландын шигшээ багууд медалийн тавцанд зогслоо.

Хэдийгээр Бразил улс дэлхийн аваргын таван түрүү, хоёр мөнгө, хоёр хүрэл медальтай ч Германы шигшээ баг дөрвөн алт (1954, 74, 90, 2014), дөрвөн мөнгө (1966, 82, 86, 02), дөрвөн хүрэл медаль (34, 70, 06, 10) хүртсэн амжилтаараа тэргүүлж байна.  

Ингээд 20 дахь удаагийн дэлхийн аварга шалгаруулах тэмцээний финалын тоглолтын сонирхолтой фото агшнаас хүргэж байна.

Ч.ШАРХҮҮ