Авлигатай тэмцэх газрын дар­га Ч.Сангарагчаа даваа гаригт сэтгүүл­чид­тэй уулзаж, тус газар болон өө­рийг нь тойрсон дуулиантай асууд­­луудаар мэдээлэл хийсэн би­лээ. Тэрбээр УЕПГ-ын зүгээс АТГ, түүний даргад дарамт шахалт үзүүл­дэг тухай нэлээд олон удаа янз бүрийн тайлбартайгаар дурьдсан. Харин түүний энэ мэдээлэлд  Улсын ерөнхий прокурор /УЕП/-ын туслах бөгөөд Мөрдөн байцаах ажиллагаанд хяналт тавих хэлтсийн дарга Л.Болд, УЕП-ын дэргэдэх Мөрдөн бай­цаах албаны дарга Б.Галдаа нар ня­цаалт хийснийг хүргэж байна. Тэд үүнийгээ Ч.Сангарагчаагийн талаар бодит мэдээлэл өгч байна хэмээн сэт­гүүлчдэд хэлсэн юм.

Л.Болд:
-АТГ-ын дарга Ч.Сангарагчаа төс­вийн хөрөнгийг зориулалтын бу­саар зар­цуулж байна гэсэн мэдээллийг АТГ-ын зарим ажилтан өгсний дагуу УЕП-ын дэргэдэх Мөрдөн байцаах ал­банаас энэ зургадугаар сарын 8-нд эрүүгийн хэрэг үүсгэн шалгаж байна. Төсвийн хөрөнгийг зориулалт бусаар зарцуулсан гэдэг үндэслэлээр. Энэ хэргийг шалгах явцад АТГ-ын зарим ажилтныг хууль бусаар,  Гүйцэтгэх ажлын хууль тогтоомжийг зөрчиж тагнах, мөрдөн мөшгих ажиллагааг явуулсан тухай мэдээлэл бидэнд ирж, энэ дагуу нь шалгахад үйлдэл дээрээ баригдсан. Энэ асуудлаар УЕП, ТЕГ-ын даргын хамтарсан тушаалаар ажлын хэсэг гаргаж шалгаж байна. Монгол Улсын Авлигын эсрэг хуулийн 22 дугаар зүйлийн 22.4-т зааснаар АТГ-ын даргын бүрэн эрхийг түдгэлзүүлэх асуудлаар УЕП-оос УИХ-д санал оруулах явцад Ч.Сангарагчаа дарга ор үндэслэлгүй мэдээллийг олон нийтэд тараалаа. “Прокурорын байгууллагаас АТГ-ын удирдлагад зарим нэг хэргийг хэрэгсэхгүй болгох тухай үүрэг өгсөн, Дарамт шахалт үзүүлж байгаа” гэж Ч.Сангарагчаа дарга ташаа мэдээлсэн. АТГ-ын үндсэн үүрэг нь эрүүгийн хэргийг мөрдөн шалгах явдал. Зөвхөн прокурорын байгууллага эрүүгийн хэргийг шийдвэрлэх, тухайлбал, хэрэгсэхгүй болгох эрхтэй. Тэгэхээр АТГ-ын даргад прокуророос үүрэг өгсөн байх ямар ч үндэсгүй юм.
Харин УИХ-ын гишүүн Л.Гүн­­далайд холбогдох хэргийг нэлээд эрт түдгэлзүүлсэн. Энэ хэрэг дээр ямар нэг эрүүгийн байцаан шийтгэх ажил­лагаа явуулаагүй. Тэгэхээр УЕП-оос Л.Гүндалайд холбогдох хэр­гийг хэрэгсэхгүй болгох үүрэг өгсөн гэ­дэг нь ор үндэсгүй гүжирдлэг. Энэ асуудал дээр зөвхөн прокурор шийд­вэр гаргадаг байтал АТГ-ын даргад хэргийг хэрэгсэхгүй болго гэсэн үүрэг өгсөн гэдэг нь ор үндэсгүй, байж болшгүй зүйл. Ийм гүтгэлэг та­раасан, прокурорын байгууллагын нэр хүн­дийг унагасан, түүний удирд­лагад хол­богдуулан ху­дал мэдээлэл та­рааж гүтгэсэн асуу­дал дээрээ Ч.Сан­­га­рагчаа зохих ёс­ны хариуцлага хүлээх ёстой гэж про­ку­рорын байгууллага үзэж байна.
Ав­лигатай тэмцэх тухай хуулийн 22.4-т зааснаар АТГ-ын дарга Ч.Сан­га­рагчаагийн  албан тушаалын бүрэн эрхийг түдгэлзүүлэх саналыг УЕП-оос өчигдөр УИХ-д өргөн барь­сан.  Прокурорын байгууллага нь аливаа нэгэн албан тушаалтны хууль бус ажиллагааг өөгшүүлэхгүй, зо­хих ёсоор нь шалгаж, хариуцлага тоо­цуу­лах болно гэдгийг би мэдээлж бай­на.
Б.Галдаа:
-Сүүлийн үед ямар нэгэн улс төрийн зорилготой, улс төрийн өнц­гөөс харж, зарим зүйл дээр УЕП-ыг холбогдуулсан байдлаар, мөн Мөрдөн байцаах албаны удирдлага юм уу, миний нэртэй холбогдуулсан дэндүү ташаа мэдээллүүд гарч байна. “Прокурор Б.Галдааг ажлаа өг гэж дарамталж эхэлжээ” гэх жишээтэй. Би УЕП Д.Дорлигжавтай тийм өргөдөл гомдол авах өгөх тухай ярих байтугай ажил хэргээ ярих завгүй явж байна. Ямар утга агуулгаар, ямар зорилгоор, ямар эх сурвалж нь тийм хилс ташаа юм өгөөд байгааг мэдэхгүй. Энэ нь хуулийн байгууллагын ажлыг гацаанд оруулах гэсэн зорилготой юм уу гэж би боддог. Хуулийн байгууллагын ажлыг ямар нэг улс төртэй битгий хутгаач ээ гэж хүсмээр байна. УЕП үүрэг өгсөн учраас би Ч.Сангарагчаагийн хэргийг шалгаж байгаа мэтээр хэд хоногийн өмнө мэдээлсэн. Ажлаа хийж яваа биднийг битгий сэтгэл санааны бухимдалд оруулаач гэж хүсмээр байна. Миний гол хэлэх зүйл энэ. АТГ-ыг хуулийн дагуу шалгаж л таарна. Бид Ч.Сангарагчаа даргын хэлснээр хэдэн орон сууцны асуудлаар тэдний хүмүүсийг дуудаад төрийн ажил алдуулаад байгаа юм байхгүй. Энэ бол ганц нэг орон сууцны асуудал биш. Олон талтай юм бий. Бид тэр байгууллагын үйл ажиллагааг алдагдуулахгүйгээр хуулиар хүлээсэн үүргээ биелүүлнэ гэлээ.
Энэ мэдээллийнхээ дараа Л.Болд, Б.Галдаа нар сэтгүүлчдийн асуул­тад хариулав. Ингэхдээ зөвхөн Ч.Сан­га­рагчаагийн мэдээлэлтэй холбоотой асуул­тад л хариулна гэсэн юм.
-Прокурорын байгууллага өнгөр­сөн хугацаанд хэчнээн хэргийг хэрэг­сэхгүй болгосон бэ. Үүнийг тоо баримтаар хэлнэ үү. АТГ-ын ямар ажилтан ямар хэргээр одоо шал­гуулж байгаа вэ?
Л.­Болд: -Тоо хэлэх боломжгүй. Тэр бол нууц. АТГ-ын ажилтнуудаас байгууллагынхаа зөрчлийн талаарх мэдээллийг зөвхөн прокурорын бай­гуул­лагад ч өгөөгүй.  Монгол Улсын Ерөнхийлөгчид, УИХ-д нэр хаягаа заагаад өгсөн мэдээллүүд бий. Тэр дагуу л шалгаж байна. Ямар үндэс­лэлээр эрүүгийн хэрэг үүсгэсэн нь нуу­цын зэрэглэлтэй байгаа.
Б.Галдаа: -Төсөв хөрөнгийг зар­цуул­даг, гарын үсэг зурдаг эрх бүхий төсвийн ерөнхийлөн захирагч, төсвийн ерөнхий менежер хүмүүс л төсөвтэй холбоотой зүйлийг нааш цааш болгодог. Энэ хүрээнд л асуудал яригдана. Товчхон хэлэхэд орон сууц­наас гадна төсвийн хөрөнгийг сур­галтын зардалд үргүй зарсан. Гадаад, дотоодод докторын диссертац хамгаалахад ч зарцуулсан. Хувцас хунар бэлтгэсэн, байр сав авсан гээд олон зүйл байгаа.
-АТГ-ын хоёр газрын даргын өрөөг лацадсан байгаа. Энэ талаар мэдээлэл өгөх үү?
Л.Болд: -Өнөөдрийн байдлаар үүн дээр ажиллагаа явуулж байгаа учраас дараа хариулья. Энэ талаар одоо ярих боломжгүй байна.
-Нэлээд мөнгөөр аяны зориу­лалт­тай, загасны хэрэглэл авсан гэсэн?
Б.Галдаа: -Түүнийг шалгаж байгаа.
-Долдугаар сарын 1 дөхөж байна. Тэр үеэр хүний амь хохи­роосон хэрэгт сэжиглэгдсэн цаг­даа­гийнхныг Өршөөлд хамруулсан, хэргийг нь хэрэгсэхгүй болгосныг прокуророос сэргээж байгаа гэсэн?
Л.Болд: -Сэргээж байгаа тухай мэдээлэл хэвлэл, мэдээллээр нэлээд гарсан. Хохирогчид болоод тэдний өмгөөлөгчдийн гомдлоор энэ асуудал УЕПГ-т хянагдаж байгаа. Энэ талаар ямар нэг шийдвэр гараагүй байна.

Д.ОЮУНЦЭЦЭГ