&#34Аврагч&#34, &#34Хилчин&#34 багууд түрүүллээ

Волейболын сонирхогчдын улсын аварга шалгаруулах тэмцээний аваргаар "Аврагч", "Хилчин" багууд шалгарлаа.

Монголын волейболын холбооноос сонирхогчдын улсын аварга шалгаруулах тэмцээнийг хоёр дахь жилдээ зохион байгуулж байна. Энэ сарын 21-нд Монгол Улсын Их сургуулийн IV байранд эхэлсэн УАШТ-нд эрэгтэй 23, эмэгтэй найман баг өрсөлдсөнөөс өнөөдөр медалийн эзэд тодорлоо.

Эрэгтэйчүүдээс спортын мастер С.Амгаабазар дасгалжуулачтай, спортын мастер Э.Баттөр ахлагчтай ОБЕГ-ын "Аврагч" баг аваргын алтан медаль хүртсэн бол Б.Болд дасгалжуулагчтай, спортын мастер Д.Базарваань ахлагчтай "Замчин спорт" клубийн "Замчин" баг мөнгөн медаль хүртлээ. Энэхүү тоглолтод "Аврагч" баг 3:2-ийн харьцаагаар ялалт байгуулсан байна. Хүрэл медалийг тус тэмцээний өнгөрсөн жилийн аварга спортын мастер Г.Баасанхүү дасгалжуулагчтай, спортын мастер У.Эрдэнэ-Очир ахлагчтай Орхон аймгийн "Хангарьд" баг хүртлээ. Тэмцээний тусгай байрт Ж.Гүрбазар дасгалжуулагчтай, спортын I зэрэгтэй У.Одгэрэл ахлагчтай "Булган Эрдэнэт ЦТС" баг шалгарлаа.

Эмэгтэйчүүдийн аваргын алтан медалийг Д.Солонгоо дасгалжуулагчтай ОУХМ Л.Нарантуяа ахлагчтай ХХЕГ-ын "Хилчин" баг хүртсэн бол мөнгөн медалийг н.Цолмон ахлах дасгалжуулагчтай, спортын мастер Р.Солонго ахлагчтай "Мөнхтийн" баг хүртлээ. Хүрэл медалийг Д.Эрдэнэсайхан ахлах дасгалжуулагчтай, ОУХМ Я.Энхмаа ахлагчтай "Замчин" баг хүртсэн бол Г.Баярсайхан ахлах дасгалжуулагчтай, спортын мастер Т.Оюундэлгэр ахлагчтай "Эрчим" баг тусгай байрт шалгарлаа.

Тэмцээний шилдгүүдийг танилцуулья.

Давуулагч: эмэгтэй Р.Солонго ("Мөнхтийн"), эрэгтэй Ц.Мөнхбат ("Хангарьд")

Хамгаалагч: эмэгтэй М.Нандин-Эрдэнэ ("Хилчин"), эрэгтэй Б.Хишигдаваа ("Замчин")

Холбогч: эмэгтэй Б.Хэрлэн ("Хилчин"), эрэгтэй С.Амгаабазар ("Аврагч")

Довтлогч: эмэгтэй Я.Энхмаа ("Замчин"), эрэгтэй Б.Бямбабаяр (ЭБИТС)

Тэгш тоглогч: эмэгтэй Л.Нарантуяа ("Хилчин"), эрэгтэй Д.Базарваань ("Замчин") нар тус тус шалгарчээ.

Ч.БОЛ