Жил бүр ёсчлон тэмдэглэж, үе үеийн тамирчдадаа хүндэтгэл үзүүлдэг Монголын тамирчдын баярын өдөр өнөөдөр тохиож байна. ССАЖЯ, Спортын бэлтгэлийн төвөөс хамтран өнөөдөр "Тамирчдын баяр"-ыг зохион байгуулж байна.

Монголын спортын салбарынхан Спортын төв ордонд цуглаж, дэлхийд нэр алдраа дуурсгасан тамирчдынхаа алдрыг магтан дууллаа. Монгол улсынхаа нэр алдрыг олимп, тив, дэлхийн тэмцээнд дуурсгасан үе үеийн алдарт тамирчид өнөөдөр биеийн тамир, спортыг сурталчилсан өглөөний алхалт хийж, Сүхбаатарын хөшөөнд цэцэг өргөн, спортын парад, ёслолд оролцсон байна.

"Тамирчдын баяр"-ын өдөр тохиож байгаа энэ өдөр Төв аймгийн Зуунмод хотноо Азийн кросс гүйлтийн өсвөрийн аварга шалгаруулах тэмцээн болж байгаа бол Спортын төв ордноо Монгол Улсын Ардын багш, Гавьяат дасгалжуулагч Д.Бандийн нэрэмжит өсвөрийн улсын аварга шалгаруулах "Олимпийн гараа" тэмцээний хагас шигшээ тоглолтууд болж байна. Түүнчлэн МУИС-ийн зааланд волейболын сонирхогчдын Улсын аварга шалгаруулах тэмцээний шигшээ тоглолтууд үргэлжилж байгаа гээд дотоодын тэмцээн, уралдаан олонтой өнжиж байна.