Азийн самбо бөхийн холбооны 2-р конгресс Узбекистаны Ташкент хотноо хуралдаж, дөнгөж сая өндөрлөлөө. Конгресст 19 орны төлөөлөгч оролцож, холбооны тайлан, цаашдын зорилт, самбыг хэрхэн хөгжүүлэх, уралдаан тэмцээний талаар илтгэж, зохион байгуулалтын асуудал хэлэлцэв. Энэ үеэр Азийн Самын холбооны Удирдах зөвлөлийн гишүүд, комиссын дарга нарыг сонгосны дунд Эмэгтэйчүүдийн комиссыг Монгол Улсын иргэн тэргүүлэх боллоо. Монголын самбо бөхийн холбооны өрөнхий нарийн бичгийн дарга, дэлхийн хошой аварга, Монгол Улсын Гавьяат тамирчин Х.Батхишиг ийнхүү тивийн хэмжээний зүтгэлтэн болж байна.

Мөн тус конгрессийн үеэр 2015 оны Азийн самбо бөхийн аварга шалгаруулах тэмцээнийг Туркменистаны Ашгабат хотноо дөрвөн насны ангиллаар зохион явуулах шийдвэр гаргалаа.

Б.Цагаанбаатар Ташкент хотоос мэдээлэв