Судан улсад үүрэг гүйцэтгэнэ

Хуучирсан мэдээ: 2010.06.29-нд нийтлэгдсэн

Судан улсад үүрэг гүйцэтгэнэ

Манай улсаас энхийг сахиулах ажиллагаанд үүрэг гүйцэтгэх эмч нар баг, бүрэлдэхүүний бэлэн байдлыг НҮБ-ын шинжээчид ирж шинжилсний дараа 60 офицер ахлагч, энгийн ажилтан албан хаагчдын бүрэлдэхүүнтэй цэргийн хээрийн эмнэлэг ирэх сард Судан улсыг зорих юм. Анх удаа цэргийн эмч нараас бүрдсэн цэргийн хээрийн хөдөлгөөнт эмнэлэг Судан улсын Эль Фашер хотоос баруун хойш Кабкабия дахь НҮБ-ын баазад байрлан, үүрэг гүйцэтгэх аж. Цэргийн хээрийн хөдөлгөөнт хоёрдугаар шатны эмнэлгийн бүтэц зохион байгуулалт, эмчилгээний хэрэгслийн хангалт, хүчин чадал, үйл ажиллагааны бэлэн байдалтай УИХ, Засгийн газрын гишүүн Батлан хамгаалахын сайд Л.Болд, ЗХЖШ-ын дарга, дэслэгч генерал Ц.Бямбажав, дэд дарга, бригадын генерал Баярмагнай болон УИХ-ын гишүүн байнгын хорооны дарга З.Энхболд, Ерөнхийлөгчийн тамгын газрын дарга Д.Баттулга, ХЗДХ-ын сайд Г.Нямдорж , УИХ-ын гишүүн Д.Арвин тэргүүтэй албаны хүмүүс биечлэн танилцлаа.
Тус хоёрдугаар шатны эмнэлгийн бие бүрэлдэхүүн нь хүлээн авах, мэс засал, гэмтлийн, эрчимт эмчилгээний, яаралтай тусламжийн, шүдний тасаг, эмийн сан, эмнэлгийн татан гаргалтын бүлэг, хангалт үйлчилгээний гэсэн бүтэцтэйгээр НҮБ-ын цэргийн албан хаагч, иргэний цагдаагийн албан хаагч, цэргийн ажиглагч, штабын ажилтнууд, НҮБ-ын сайн дурын ажилтнууд, түүнчлэн хариуцлагын бүсэд оршин суугаа энгийн ард иргэдэд эмнэлгийн үйлчилгээ үзүүлэх юм байна.Түүнчлэн яаралтай тохиолдолд автомашин болон нисдэг тэргээр татан гаргалт хийхийн зэрэгцээ 1500-2000 орчим өвчтөнд долоо хоногийн эмнэлгийн нөөцтэйгөөр бие даасан үйлчилгээ үзүүлж, өдөрт дөрвөн хүнд мэс засал хийх хүчин чадалтайгаар ажиллах гэнэ. Цэргийн хээрийн хөдөлгөөнт эмнэлгийн багаж хэрэгсэл, тоног төхөөрөмжийн асуудлыг НҮБ-аас бүрэн хрөнгө оруулсан бөгөөд эмч нарын 40 хувь нь өмнө нь ажиллагаанд явж байсан туршлагатай аж. Хуурай цөлийн уур амьсгалтай, хуурай болон борооны улиралтай учраас тухайн бүс нутагт амьсгалын дээд замын үрэвсэлт өвчнүүд, хумхаа, гэдэсний халдварт суулгалт өвчнүүд, сүрьеэ, менингэт ихэвчлэн зонхилдог байна.

Д.Долгор

NewsMN Гар утасны хувилбар Татах
NEWS.mn

Мэдээллийн эх сурвалж