Индонези улсын Бали арал дээр Ази Номхон Далайн Бүсийн гүйцэтгэх зөвлөлийн хуралд 36 орны гишүүн төлөөлөгчид цуглаж, шуудангийн хөгжлийн ирээдүйн чиг хандлага, тулгарч буй бэрхшээл түүнийг хэрхэн даван туулах, шинэ техник, технологи нэвтрүүлэх, шуудангийн хэрэглээг хэрэглэгчдэд хэрхэн ойртуулах зэрэг чухал асуудлуудыг хөндсөн хурал 2010 оны зургаадугаар сарын 21-25-ны өдрүүдэд амжилттай зохион байгуулагдаж өнгөрлөө.

Энэхүү хурлын үеэр улс хоорондын бичиг захидлын чанарын үзүүлэлтээр Дэлхийн шуудан холбооны гишүүн 191 орноос Монгол Улсын шуудангийн үндсэний оператор болох “Монгол Шуудан” ТӨХК  хоёрдугаар байр эзлэн мөнгөн өргөмжлөл хүртэжээ. Ийнхүү тус компани Монгол Улсын нэр хүндийг дэлхийн шуудангийн үйлчилгээ үзүүлэгч  орнуудын дунд амжилттайгаар гаргалаа.

Хурлын үеэр “Монгол Шуудан” ТӨХК-ийн гүйцэтгэх захирал Г.Чинзориг Дэлхийн Шуудан Холбооны, дэд Ерөнхийлөгч болон Ази номхон далайн бүсийн тэргүүн нартай уулзаж, Монгол улсын шуудангийн хөгжлийн өнөөгийн байдал, тулгамдаж байгаа асуудлууд, гадаад харилцаа, хамтын ажиллагааг хэрхэн өргөжүүлэх, шуудангийн үйлчилгээний чанарыг сайжруулахад чиглэгдсэн шинэ техник, технологи нэвтрүүлэх зэрэг асуудлуудыг хөндөж, тодорхой асуудлуудыг шийдвэрлүүллээ.