2014 оны хөлбөмбөгийн дэлхийн аварга шалгаруулах тэмцээний хэсгийн шатны сүүлийн тоглолтууд өнөө шөнө /VI.24/ 00:00 цагаас эхэлнэ. Өнөө шөнө 00:00 цагаас /Улаанбаатарын цагаар/ В хэсгийн Нидерланд болон Чили, Испани болон Австралийн тоглолт болно. Харин үүрийн 04:00 цагаас А хэсгийн Камерун Бразил, Хорват Мексикийн шигшээ багийн тоглолт болох юм. Тоглолтын эргэн тойрны мэдээллийг багцлан хүргэе.

НИДЕРЛАНД – ЧИЛИ

Чили, Нидерландын шигшээ олон улсын чанартай томоохон тэмцээнд хоёр дахь удаагаа учраа таарч байна. Өмнө нь, 1928 оны зуны олимпын наадмаар Чили, Нидерланд 2:2-ын харьцаатай тэнцэж байжээ. Тэгэхээр Нидерланд, Чили 86 жилийн дараа тоглох гэж байна.

Нидерланд, Чилийн шигшээ ДАШТ-ий В хэсгээс дараагийн шатанд шалгарах эрхээ авсан. Гэхдээ Чили, Нидерландын аль нь В хэсгийг тэргүүлэхээ үзэх тун сонирхолтой “тулаан” болно. Энэ тоглолтод Нидерландын шигшээ багийн ахлагч Робин ван Перси торгуулийн улмаас оролцохгүй. Робин ван Перси хэсгийн шатны Испани, Австралитай хийсэн тоглолтод дараалан шар хуудас хүртсэн юм. Мөн Нидерландын төвийн хамгаалагч Вруно Мартинс Инди гэмтлийн улмаас оролцохгүй нь тодорхой болсон. Харин Чилийн шигшээ багаас гарааны хагас хамгаалагч Чарлес Арангуис гэмтлийн улмаас талбайд гарахгүй. Чарлес Арангуис Испанийн шигшээ багийн хаалганд гоол оруулсан Чилийн гарааны найруулагч байсан юм. Мөн Чилийн шигшээн “зүрх” Артура Видаль Нидерландын эсрэг тоглох эсэх нь эргэлзээтэй байна.

Нидерланд, Чилийн 2014 оны ДАШТ-д хэрхэн тоглосныг сонирхъё.  

Нидерланд:

Испани 1-5 Нидерланд

Австрали 2-3 Нидерланд

Нидерланд ДАШТ-д Өмнөд Америк тивийн шигшээ багуудтай 11 удаа тоглохдоо хоёр удаа хожигджээ. Нидерланд 1978 оны ДАШТ-д Аргентины шигшээд нэмэлт цагт 3:1, 1994 оны ДАШТ-д Бразилд 3:2-ын харьцаатай хожигдож байж. Мөн Нидерландын “Улбар шарууд” 1994 оноос хойш ДАШТ-ий хэсгийн шатанд нэг ч удаа хожигдоогүй аж.

Чили:  

Чили 3-1 Австрали

Испани 0-2 Чили

Чилийн шигшээ ДАШТ-ий 11 тоглолтод хоёр удаа Европ тивийн багийг хожжээ. Мөн Чили ДАШТ-ий түүхэндээ хэзээ ч гурав дараалан хожиж байгаагүй аж.

АВСТРАЛИ – ИСПАНИ

Австрали, Испанийн шигшээн хувьд 2014 оны ДАШТ өндөрлөсөн. Тиймээс Австрали, Испани хожилтой, оноотой нутгийн зүг буцахаа шийдэхээр тэрүүхэндээ л бяцхан тэмцэл өрнүүлнэ. 2008 оноос хойш Испаничууд зургаан жил хөлбөмбөгийн ногоон дэвжээг эзэгнэсэн. Гэвч Испаничуудын тамирчид нь хөгширч, арга барил нь хэтэрхий тодорхой болсноос 2014 оны ДАШТ-ий хэсгийн шатнаас мултарлаа.

Испани, Австралийн 2014 оны ДАШТ-д хэрхэн тоглосныг сонирхъё.

Испани:

Испани 1-5 Нидерланд

Испани 0-2 Чили

Австрали:
Чили 3-1 Австрали

Австрали 2-3 Нидерланд

Б.БИЛЭГ