Узбекстаны Ташкент хотод болж байгаа өсвөрийн шатрын Азийн аваргын рапид төрөлд манай шатарчид гурван алт, хоёр мөнгө, дөрвөн хүрэл медаль хүртжээ.  Тэгвэл Арабын нэгдсэн Эмират улсад рапид болон блицийн дэлхийн аварга шалгаруулах тэмцээн болж өндөрлөлөө. Уг тэмцээнд манай улсаас их мастер Б.Гүндаваа, ФИДЕ мастер З.Бямбаа нар оролцов.

Харин ОХУ-ын Воронеж хотод шатрын дөрөв дэх дэлхийн аварга Александр Алехины дурсгалд зориулсан олон улсын тэмцээний “Мастеруудын нээлттэй” ангилалд их мастер Ц.Батчулуун, олон улсын мастер Б.Мөнгөнтуул нар өрсөлджээ. Дэлхийн шатрын холбоо Монголын шатрын холбооны хүсэлтийн дагуу ФИДЕ-гийн төлөөлөгч, олон улсын шүүгч, олон улын зохион байгуулагч Г.Алтан-Очийг үүрэгт ажлаас нь чөлөөлсөн байна. Г.Алтан -Очийн оронд олон улсын шүүгч, ФИДЕ дасгалжуулагч UK Academy-г санаачлагч Ц.Сайнбаярыг томилжээ. Ц.Сайнбаяр нь Англид ажиллаж амьдардаг юм.

Мөн ФИДЕ-гийн ерөнхийлөгч Kирсан Ильюмжинов одоогийн дэлхийн аварга, Норвегийн их мастер Maгнус Карлсен, Энэтхэгийн их мастер Вишванатан Ананд нарын хооронд дэлхийн шатрын аваргын титмийн даага нэхэх тоглолтын товыг зарлалаа. Сочи хотноо болох уг тоглолт анх удаа олимпийн тосгоны нутаг дэвсгэр дээр болж байгаа юм. Тэмцээн ирэх арваннэгдүгээр сарын 7-нд эхлэх тоглолт 21 хоногийн турш үргэлжилнэ. Энэхүү тэмцээний төсөв нь гурван сая ам.доллар ажээ.

Б.ЗУЛ

Эх сурвалж: "СПОРТЫН ШУУДАН" сонин