Киргизэд өнгөрсөн ням га­рагт болсон
бүх нийтийн санал ху­раалтад оролцогсдын 90 гаруй хувь нь шинэ Үндсэн
хуулийн төлөө саналаа өгчээ. Ингэснээр иргэд Роза Отунбаевад 2011 оны
арванхоёрдугаар сарын 31-нийг хүртэл шилжилтийн үеийн Засгийн газрын
Ерөнхийлөгчийн эрхийг олгосон байна.

Роза Отунбаева санал ху­раалтын үр дүнгээр одоогийн эрх баригчдыг хууль
ёсных болж байгааг онцолсон байна. Тэрбээр “Энэ бол түр Засгийн газар
бус хууль ёсны Засгийн газар байх болно” гэжээ. Үүнээс өмнө эрх
баригчдын хувьд аливаа шийдвэр гаргах нь хууль ёсных эсэх нь тодорхой
биш байснаас гацаанд орох нь түгээмэл байжээ.

Роза Отунбаева шинэ бүрэл­дэхүүн бүхий сайд нарын танхимийг бүрэлдүүлнэ
гэдгээ амлажээ. Ирэх долдугаар сарын дундуур болох парламентын сонгуульд
оролцох улс төрийн удирдагчид түр Засгийн газрын бүрэлдэхүүнээс гарах
аж. Мөн Засгийн газрын одоогийн бү­рэлдэхүүнийг хямралын үеийн тус­гай
хороо юм уу чуулган болгон өөр­чилж, шинээр Засгийн газар бү­рэлдэх
хүртэл хямралын үед тогтоол гаргаж байхаар шийдвэрлэжээ.

Ард түмнээс санал хурааж бо­ловсруулсан Үндсэн хуулийн шинэ төслийн
да­гуу Киргизийг Ерөн­хийлөгчийн засаг­лалаас пар­ламентын засаглалд
шил­жүүлэхээр заасан. Бүх ард түмний санал асуулгын хоёр дахь асуулт нь
Роза Отунбаевагийн тө­рийн тэргүүний эрхийг 2011 оны арванхоёрдугаар
сарын 31 хүртэл сунгах тухай байжээ. Ажиглагчдын дүгнэж буйгаар иргэд
санал асуулгад ерөн­хийдөө тайван оролцсон бө­гөөд шинэ хуулийн төслийн
на­рийн учрыг ойлгохоосоо ойл­гохгүй нь их байсан аж. Тэд Ерөнхийлөгчийн
юм уу парламентын засаглалын ялгааг мэдэрч сонголт хийхээсээ илүү
тогтвортой засаглал бий болгохын төлөө саналаа өгч байгаагаа хэлж
байжээ.

Д.МЕДВЕДЕВ: КИРГИЗ ЗАДРАХЫГ ҮГҮЙСГЭХГҮЙ
ОХУ-ын Ерөнхийлөгч Д.Мед­ведев Их 20-ийн уулзалтын үеэр Киргизэд
парламентын засаглалын үзэл санаа хэрхэн хэрэгжихийг төсөөлөхгүй байгаа
бөгөөд тус улс задрахыг үгүйсгээгүй бөгөөд “Энэ бүхэн бол Киргизийн
дотоод хэрэг гэдгийг урьдчилан хэлье. Гэвч тэнд эрх баригчдад нь  эмх
журам тогтоох чад­вар дутагдаж, засаг төр нь хууль ёсных бус, ард түмний
зүгээс дэмжлэг багатай байхад парламентын засаглал хэрхэн ажил­лахыг би
төсөөлөхгүй байна” гэ­жээ. Мөн Д.Медведев “Энэ бү­хэн Киргизийн хувьд
маш олон боломжийг бий болголоо. Тухайлбал, улс орон задрах хүртэл тун
таагүй нөхцөлүүд бий. Тийм хувилбараас сэргийлэхийн тулд хүчтэй, зохион
байгуулалт сайтай түүхэн бодит байдал, ард түмнийхээ хүсэл зоригийг
харгалздаг төр хэрэгтэй. Энэ бүхний эцэст юу болохыг нь харцгаая” гэжээ.
 

К.БАКИЕВ: БИД ОРОСЫГ УУРЛУУЛСАН
Киргизийн удирдагч асан К.Ба­киев Германы “Шпигель” сэтгүүлд өгсөн
ярилцлагадаа сүүлийн үед болсон эмх замбараагүй явдалд өөрийгөө огт
хамаагүй гээд Оростой харилцах амаргүй харилцааныхаа тухай ярь­жээ.
Тэрбээр Киргизэд болсон хэ­рэг явдалд Роза Отунбаева тэр­гүүтэй Засгийн
газрыг буруутгаад. “Тэднийг засгийн эр­хэнд гарахаас өмнө тийм цуст
мөргөлдөөн гарч байгаагүй” гэжээ. Тэрбээр Роза Отунбаева улс тө­рийн
ямар ч туршлагагүй, өндөр алба хашиж байгаагүй, үйлдэл нь эмэгтэй хүнийх
шиг хөнгөн хийсвэр байгааг онцолжээ. Роза Отунбаеваг дипломатчийнхаа
хувьд баруунд илүү танигдсаныг сөрөг хүчний нөлөө бүхий улстөрчид
ашиглаж, түүнийг барь­цаалсан хэмээн үзэж буйгаа хэлсэн байна.

К.Бакиев Киргизэд үндэстэн хоо­рондын мөргөлдөөн анх удаа гараагүй
болохыг ярьжээ. “Кир­гизэд 80 гаруй үндэстэн, ястан амьдардаг. Гэсэн ч
төр за­саг саяхныг хүртэл гал авалцахад унтрааж, цаашид газар  авахаас
нь сэргийлж байсан” гэжээ. Харин түр Засгийн газар удирдах ямар ч
чадваргүй, арчаагүй бо­лохоо харуулсан гэж үзэж буйгаа хэлжээ. Киргизэд
парламентын за­саглал бий болгох боломжийн хувьд тэрбээр хүчирхэг овог,
бүлэглэлүүдийн нөлөө их бөгөөд парламентад олон нам төлөөлөлтэй байдгийг
онцолсон байна. Тиймээс парламентад али­ваа шийдвэр гаргахад маш их
хугацаа шаардагдахыг хэлжээ. К.Бакиев “Хүчирхэг Ерөнхийлөгч хавьгүй
хурдан ажилладаг” гэжээ.
Ерөнхийлөгч асан өөрийг нь огцруулсан тухайд ярихдаа “Бид америкчуудтай
байгуулсан цэргийн баазын гэрээг сунгаж, Оросыг уурлуулсан” гэжээ. 

Д.Мөнхболд

Зохиогчийн эрх: “Улс төрийн тойм” сонин