Өнөө шөнө ДАШТ-ий А хэсгийн Хорват болон Камерун, В хэсгийн Австрали болон Нидерланд, Испани болон Чилийн шигшээн тоглолт болно. В хэсэгт “Нисдэг Голланд”-ын улбар шар армид 5:1-ийн харьцаатай хожигдсон “Ялагдашгүй Армада” Испанийн шигшээ баг тун хариуцлагатай тоглолтыг Чилитэй хийнэ. Энэ тоглолтыг Испанийн шигшээн гол найруулагч Андрес Иниеста “Шигшээ тоглолт мэт ширүүн тулаан өрнөнө” гэж дүгнэсэн байна. Өнөө шөнийн тоглолтод Испани Чилийн шигшээд хожигдож, эсвэл тэнцвэл 2014 оны ДАШТ-ийг орхих болно. Тиймээс зөвхөн хожих даалгавартай талбайд гарна. Харин Чилийн шигшээ хүчирхэг Испаниас тэнцээний нэг оноо салгахын төлөө тэмцэж болох юм. Нөгөө талд Австрали Нидерландын шигшээг хожоогүй тохиолдолд ДАШТ-ий В хэсгээс Испани, Чилийн аль нь дараагийн шатанд шалгарах нь өнөө шөнийн энэхүү тоглолтын дараа үндсэндээ тодорхой болно.

АВСТРАЛИ – НИДЕРЛАНД

Хэзээ: 2014 оны 6 сарын 19. 00:00 цагт /Улаанбаатарын цагаар/

Хаана:  Маракана цэнгэлдэх  /Рио де Жанейро хот/ 48,849 суудалтай.

Шүүгч: Жамел Хаймоуди /Алжир/

Талбайн захын шүүгчид: Редуане Ачик /Морокко/, Абделак Эчиали /Алжир/

Дөрөв дэх шүүгч: Бакари Гассама /Гамбия/

“Нисдэг Голланд” буюу Нидерландууд 2014 оны ДАШТ-ий нээлтийн тоглолтод сүүлийн найман жил турш хөлбөмбөгийн ногоон талбайг ноёлсон Испанийг 5:1-ийн харьцаатай хожсон. Ингэснээр Нидерландчууд В хэсгийг тэргүүлэх маш сайхан боломжоо бүрдүүлж чадсан юм. Харин Австралийн шигшээ ДАШТ-ий нээлтийн тоглолтдоо Чилид хожигдсоноор Испанийн хамт В хэсгийн сүүлийн байранд бичигдэж байгаа юм.  Австрали, Нидерландын шигшээ багууд олон улсын чанартай томоохон тэмцээнд албан ёсоор таарч байгаагүй юм. Гэхдээ шилдэг тамирчин, дэлхийн хэмжээнд үзүүлсэн амжилтаар нь хоёр багийг харьцуулах аргагүй. Нидерланд ДАШТ-ээс гурван удаа мөнгөн медаль хүртэж байсан. Харин Австрали 2006 онд шөвгийн наймын шатанд шалгарч байсан юм.

ИСПАНИ – ЧИЛИ

Хэзээ: 03:00 цагт /Улаанбаатарын цагаар/

Хаана:  Бейра Рио цэнгэлдэх  /Порту Алегри хот/ 78838 суудалтай.

Шүүгч: Марк Гэйгер /АНУ/

Талбайн захын шүүгч: Марк Хюрд /АНУ/, Жое Флетчер /Канад/

Дөрөв дэх шүүгч: Наваф Шукралла /Бахрайн/

Испаничууд эхний тойрогтоо Нидерландад 5:1-ийн харьцаатай хожигдож, ДАШТ-ий нээлтээ тун тааруу эхлүүлсэн. 2008, 2012 оны Европийн аварга, 2010 оны дэлхийн аварга Испани Чилийг заавал хожих даалгавартай. Испани болон Чилийн шигшээ баг өмнө нь 10 удаа учраа таарчээ. Испаничууд найм хожиж, хоёр удаа тэнцжээ. Тоо баримт, шилдэг тоглогч гээд бүх л талаар Испаничууд илүү харагдаж байна.

Испаничууд Чилийн эсрэг довтлогч талбайд гаргахгүйгээр 4:6:0 гэсэн байрлалаар тоглоно гэсэн таамаг байна. Учир нь, Нидерландтай хийсэн тоглолтод Испанийн довтлогчид тун муу тоглосон. Тухайн тоглолтод Бразил гаралтай Диего Коста гараанд гарсан ч Испани хэв маягийн тоглолтод зохицохгүй байжээ. Испанийн дасгалжуулагч дел Боске Диего Костаг суулгаж, Фернандо Торресийг талбайд гаргасан ч төдийлөн өөрчлөлт гараагүй юм. Тиймээс довтлогч талбайд гарахгүй, зургаан хагас хамгаалагчтай хувилбарыг сонгоно гэж үзэж байна.

Харин Чили Алексис Санчес, Артура Видал гээд байгаа бүхнээ талбайд гаргана. Чили өнөөдрийн тоглолтод хожвол дараагийн шатанд шалгарах нь тодорхой болно. Харин хожигдох, тэнцэх аваас ДАШТ-ээ өндөрлүүлэх аюул тулгарна. Чили хэсгийн сүүлийн тоглолтоо Нидерландтай хийнэ. Нидерланд ямар хүчтэй байгаагаа ДАШТ-ий эхний тоглолтоороо дэлхий нийтэд гайхуулсан.

ХОРВАТ – КАМЕРУН

Хэзээ: 2014 оны 6 сарын 19. 06:00 цагт /Улаанбаатарын цагаар/

Хаана: Амазон цэнгэлдэх  /Манаус хот/ 42374суудалтай.

Шүүгч: Педру Проенца /Португал/

Талбайн захын шүүгчид: Бертину Миранда, Тиагу Тригу /Хоёул Португал/

Дөрөв дэх шүүгч: Уолтер Лопес /Гуатимала/

1998 оны ДАШТ-ий хүрэл медальт Хорватын шигшээг А хэсгийн хоёрдугаар байраар шалгарна гэж таамаглаж байлаа. Гэсэн ч Мексикийн шигшээ Бразилтай тэнцсэнээр А хэсгээс шалгарах багийг тааварлахад бэрх болгов.

Хорват 2014 оны хөлбөмбөгийн ДАШТ-ий нээлтийн тоглолтод Бразилд 3:1, Камерун Мексикт 1:0-ийн харьцаатай хожигдсоноор А хэсгийн сүүлийн байранд бичигдэж байгаа юм. Тиймээс өнөө шөнийн тоглолтод хожсон нь хэсгээс шалгарах магадлалтай үлдэж, хожигдсон ДАШТ-ийг өндөрлүүлэх юм.  

Энэ тоглолтод Африкийн “Номхоршгүй арслан” хочит Камеруны шигшээ багийн ахлагч Самуэль Эту оролцох эсэх нь эргэлзээтэй байна. Харин Хорватаас гол найруулагч Лука Модрич гэмтлийн улмаас оролцохгүй нь тодорхой болсон. Гэхдээ эхний тоглолтод торгуулийн улмаас  оролцоогүй Хорватын мэргэн бууч Марио Манжукич өнөөдөр тоглоно.

Б.БИЛЭГ