Ажил ихтэй өдрийн төгсгөлд гэрийнхээ буйдан дээр тухлаад зурагт үзэх амттай мэдрэмж төрүүлдэг шүү дээ. Их ачааллын дараах энэ бяцхан амралт бидэнд асар их таашаалыг авчирч байдаг. Тэр тусмаа дуртай киногоо шимтэн үзэх нь амар тайван амьдралын нэгэн хэвшил мэт санагддаг.

Тэгвэл өргөн дэлгэцийн болон телевизийн олон ангит кинонуудыг гаргаж, кино урлагийн эргэн тойрон дахь мэдээ мэдээллийг цаг алдалгүй хүргэж байдаг “Movie Box” суваг киноноос хүртдэг тэрхүү таашаалыг улам нэмэгдүүлэх зорилгоор шинэ, сонирхолтой олон кинонуудыг гаргахад бэлэн болоод байна

“Movie box” суваг ирэх даваа гараг буюу 6-р сарын 16-наас эхлэн Их Британи, ОХУ, БНСУ болон Бразил, Колумб кинонуудыг албан ёсны эрхтэйгээр гаргахад бэлдээд байна.

Страсти по Чапаю

Дэлхийн I дайн болон Оросын иргэний дайнд оролцож явсан, Улаан армийн цэрэг Василий Чапаевын амьдралаас сэдэвлэн бүтээсэн “Страсти по Чапаю” киног тун удахгүй гаргахаар төлөвлөөд байна. Олон хүний хувьд онигооны баатрын дүрээр хоногшиж үлдсэн энэхүү цэрэг эрийн өсвөр нас, дайнд оролцож явсан үеүд гээд олон сонирхолтой түүхүүдийг тусгасан байна. Нэрийг нь сайн мэдэх ч намтарыг нь тэр бүр мэддэггүй Чапаевын тухай “Страсти по Чапаю” киноноос “Movie box” сувгаар хүлээн авч үзээрэй.

Түүнчлэн XX зууны эхэн хагаст уран бүтээлээ туурвиж байсан, Оросын алдарт дуучин Пётр Лещенкогийн тухайн “A man who sang tango” киног удахгүй үзэгчдэд хүргэх гэж байна. Кинонд алдарт дуучны хүүхэд нас, уран бүтээлийн анхны жилүүд болон цыган бүсгүйтэй холбож явсан хайр сэтгэлийн сонирхолтой түүх, нэр алдарын оргил үеийг харуулсан байна.

A man who sang tango

Ийнхүү Оросын олон ангит киног хүргэхээс гадна кино сонирхогчдын үдшийн амралтанд зориулж нэг ангит сонирхолтой кинонуудыг дэлгэцнээ гаргах юм байна. Орос кинонууд бидэнд илүү ойрхон, нэг л дотно санагддаг шүү дээ. Тэгвэл онц сонирхолтой үйл явдал бүхий, сүүлийн үеийн Оросын кинонуудыг “Movie box” сувгаар албан ёсны эрхтэйгээр шимтэн сонирхоорой.

            Шерлок Холмс

Шерлок Холмс. Энэ бол чадварлагаас гадна адтай одтой, сонирхолтой амьдралтай мөрдөгч. Шерлок Холмст тохиолдсон нууцлаг үйл явдлууд, илрүүлсэн чадварлаг аргуудын тухай тун удахгүй “Movie box” сувгаар гарах “Шерлок Холмс” кинонд өгүүлэх юм байна. Учир битүүлэг хэргүүдийг хэрхэн илрүүлж байгааг үзэх дуртай сониуч үзэгчдэд сонирхолтой кино байх болов уу.

Мөн ирэх даваа гараг буюу 6-р сарын 16-наас эхлэн Бразилийн телевизийн олон ангит “Tangled Hearts” кино гарч эхлэх нь ээ. Романтик инээдмийн энэ кинонд өөр өөр гэр бүлд өссөн зургаан найзын тухай өгүүлэх юм байна. Хэдийгээр өөр гэр бүлд өссөн, зан араншингийн хувьд бие биенээсээ нэлээдгүй ялгаатай хүмүүс боловч бүгд мөрөөдлөө эрж хайх үедээ найз гэсэн нэгэн үгэнд зангидагджээ. Цэцгийн дэлгүүрт ажилладаг Бэнто, үзэсгэлэнт бүсгүй Амора, муу залуу Фабино нар бага байхдаа асрамжийн газарт анх танилцаж байжээ. Киноны гол дүр Бэнто, Амора нар цэвэр ариунаар бие биенээ хайрлаж байсан боловч өөр айлд өргүүлснээр амьдрал нь холдоцгоох болно. Хөгжилтэй хайрын гурвалжин, амьдралыг өөдрөгөөр харах үзэл, найз нөхөрлөлийн холбоо гээд олон зүйлийг “Tangled Hearts” кинонд харуулах болно. Тун удахгүй “Movie box” сувгаар хүлээн авч үзээрэй. “Movie box” телевиз “Tangled Hearts” киног албан ёсны эрхтэйгээр худалдан авч гаргаж байгаа дөрөв дэх телевиз болсон юм. Өөрөөр хэлбэл, Бразилд дуулиан тариад байгаа киног олон орны үзэгчдээс түрүүлж үзэх боломжтой болсон гэж хэлж болно.

            Tangled Hearts

Дашрамд дуулгахад, Бразил нь Латин Америктаа олон ангит киноны хөгжлөөрөө тэргүүлдэг бөгөөд бүс нутгийнхаа телевизийн контентийн зах зээлийн 50 орчим хувийг эзэлдэг байна. Энэ оны эхээр “Боловсрол суваг” телевизээр гарсан “Бразилийн өргөн чөлөө” кино Монголын үзэгчдэд нэлээдгүй хүлээлтийг үүсгэж байсан. Телевиз үзэлтийн хандлагыг гаргадаг “Максима Медиа”-гийн судалгаагаар өнгөрсөн дөрөвдүгээр сард олон ангит киноны төрөлд 24-ээс дээш насныхны хувьд үзэгчдийн тоогоороо 2-р байранд орж байлаа. Иймээс “Movie box” телевиз “Tangled Hearts” киног үргэлжлүүлэн Бразил болон Колумбын олон ангит киног сорчлон хүргэхээр бэлдээд байна.

Padam Padam

Ийнхүү ОХУ, Англи, Латин Америкийн кинонуудыг хүргэхээс гадна Азидаа олон ангит кино урлагаараа тэргүүлэгч БНСУ-ын рейтинг өндөртэй, залууст зориулсан кинонуудыг гаргахад бэлэн болоод байна. Ирэх даваа гарагаас эхлэн гарах “Padam Padam” кинонд БНСУ-ын чадварлаг жүжигчид болох Жан Вү Сан, Хан Жи Мин, Ким Бум нар тогложээ. Хийгээгүй хэргийнхээ төлөө 16 жилийг шоронд өнгөрөөсөн Ян Кан Чилийн хувьд гэрэлт амьдралд дахин хөл тавихад олон бэрхшээл тулгарах болно. Гэхдээ энэ бүх хүнд хэцүү зүйлсийн зэрэгцээ хайр дурлалын хүч Кан Чилийг эргэн нийгэмд хөл тавихад чухал тус хүргэдэг. Францын алдарт дуучин Эдит Пиафын дуугаар нэрлэгдсэн энэ кино 6-р сарын 16-наас эхлэн гарч эхлэх нь ээ.

БНСУ-ын KBS, SBS, MBC зэрэг томоохон телевизүүд, jTBС, tvN, CJ зэрэг продакшны рейтинг өндөртэй шилдэг кинонуудыг гаргах юм байна.

Ийнхүү кино урлагаараа тивдээ тэргүүлэгч улсуудын шинэ, сонирхолтой, шилдэг кинонуудыг сорчлон хүргэхээс гадна цаашид Америкийн цуврал кинонуудыг ч гаргахаар төлөвлөөд байгаа юм байна.