АНУ-ын Тагнуулын төв газар болон тусгай албадаас явуулсан томоохон ажиллагааны үр дүнд АНУ-д ажиллаж байсан Оросын 11 тагнуулчдыг илрүүлэн энэ сарын 27-д  ихэнхийг нь баривчалсан гэж гадаадын мэдээллийн агентлагууд мэдээлж эхэллээ. Тэднийг Нью Йорк, Виржиния, Нью Жерси мужууд болон бүр Манхэттэнаас хүртэл  олж баривчалснаас үзэхэд томоохон бүлэглэлийн чанартай ажиллаж байсан бололтой. Эдгээр тагнуулчдын 8 нь гэр бүлийн хүмүүс болон бүртгэгдэж АНУ-ын иргэний хуурамч бичиг баримтьыг ашиглаж байсан гэж зарим эх сурвалж мэдээлж байна. Тэднийг ОХУ-ын гадаад тагнуулын албаны даалгавраар үүрэг биелүүлж байсан гэж урьдчилан мэдээлэгдэж байгаа ажээ. Нэлээд олон жилийн хугацаанд тэдгээр тагнуулчид АНУ-ын улстөрийн дээд хүрээнийхнээс мэдээлэл авч нэгтгэн удирдлагадаа дамжуулдаг байсан гэж эх сурвалжууд мэдээлж байгаа юм. Мөн тэднийг хууль бус тагнуулын ажиллагаанаас гадна мөнгө угаах гэмт хэрэг үйлдсэн гэж давхар яллахаар болж байгаа гэнэ. Хэрэв эдгээр 11 хүний хийсэн гэмт үйлдэл батлагдвал хууль бус тагнуул хийсэн хэргээр 5 хүртэл жил, харин мөнгө угаахаар завдсан нь батдагдвал 25 жилийн ялыг оноож болох гэнэ. Одоогооор Оросын талаас энэ хэргийн тухайд албан мэдээлэл хийгдээгүй байгаа аж.

М.Наст