"Ролан Гаррос-2014"-ийн 13 дахь өдөр буюу өнөөдөр эрэгтэйчүүдийн хагас шигшээ тоглолт болж, шигшээд өрсөлдөх теннисчид тодрох юм.

Шороон талбайн хаан гэгддэг Испаний Рафаэль Надаль Их Британы Энди Мюррейтэй, хоёрт эрэмбэлэгдсэн Сербийн Новак Жокович Латвийн Эрнест Гулбистай тоглоно.

Шилдгүүдэд халгаатай байгаа "Ролан Гаррос"-ын эрэгтэйчүүдийн хагас шигшээд олонхийн таамаглаж байсан найман түрүүт Испаний Рафаэль Надаль, 2012 оны дэд аварга Сербийн Новак Жокович, Их Британы Энди Мюррей нар шалгараад байна. "Их дуулга"-ын 17 түрүүт Швейцарийн Рожер Федерерийг дөрөвдүгээр тойрогт, зургаад эрэмбэлэгдсэн Чехийн Томаш Бердыхыг шөвгийн наймд хожсоноор Латвийн Эрнест Гулбис хагас шигшээд шалгарсан. "Ролан Гаррос-2014"-т 18-д эрэмбэлэгдсэн Гулбис "Их дуулга" тэмцээний хамгийн оргил амжилтаа үзүүлээд байна.

1/2 шигшээ:

• Испаний Рафаэль Надаль (1) – Их Британы Энди Мюррей (7)

• Сербийн Новак Жокович (2) – Латвийн Эрнест Гулбис (18)

"Ролан Гаррос"-ын 12 дахь өдөр буюу өчигдөр эмэгтэйчүүдийн хагас шигшээ тоглолт болж, ОХУ-ын Мария Шарапова, Румыны Симона Халеп нар шигшээд шалгарсан. 

Хагас шигшээд долоод эрэмбэтэй тоглож буй ОХУ-ын Мария Шарапова Канадын залуу теннисчин Эжени Бушарыг 4-6, 7-5, 6-2-ийн харьцаагаар хожиж, "Ролан Гаррос"-ын шигшээд гурван жил дараалан шалгараад байна. 2012 оны аварга Шарапова өнгөрсөн жилийн шигшээд АНУ-ын Серена Уильямст ялагдсан.

Харин нөгөө хэсгээс дөрөвт эрэмбэтэй Румын Симона Халеп, Германы Андреа Петрович(28) нар хагас шигшээд шалгарснаар Симона Халеп аваргын төлөө өрсөлдөх эрхээ авсан. "Ролан Гаррос-2014"-ийн шигшээд шалгарснаар Симона Халеп "Их дуулга" тэмцээний хамгийн өндөр амжилтаа үзүүлээд байна.

Эмэгтэйчүүдийн ганцаарчилсан төрлийн шигшээ тоглолт бямба гаригт буюу тавдугаар сарын 7-нд болно. Харин эрэгтэйчүүдийн шигшээ тоглолт ням гаригт болж, "Ролан Гаррос-2014" Францын "Их дуулга" тэмцээн өндөрлөнө.

Ч.БОЛОР