"Ролан Гаррос -2014"-ийн шигшээд ОХУ-ын Мария Шарапова шалгарлаа.

Талбайн теннисний оны хоёр дахь "Их дуулга" болох "Ролан Гаррос" буюу Францын нээлттэй тэмцээн Парис хотноо 12 дахь өдрөө үргэлжилж байна. Өнгөрөгч тавдугаар сарын 25-нд эхэлсэн тус тэмцээний эмэгтэйчүүдийн ганцаарчилсан төрлийн хагас шигшээд долоод эрэмбэлэгдсэн ОХУ-ын Мария Шарапова, Канадын Эжени Бушар(18), дөрөвт эрэмбэлэгдсэн Румыны Симона Халеп, Германы Андреа Петрович(28) нар шалгараад байсан. Энэ цагт Мария Шарапова, Эжени Бушар нарын тоглолт өндөрлөж, Орос теннисчин ялалт байгуулснаар бямба гаригт аваргын төлөө тоглохоор шалгарлаа.

2 цаг 27 минут үргэлжилсэн тоглолтод 4-6, 7-5, 6-2-ийн харьцаагаар Шарапова илүүрхэж, гурван жил дараалан "Ролан Гаррос"-ын шигшээд шалгарлаа. Тоглолтын эхний сет 44 минут үргэлжилэхэд Эжени Бушар 6-4-өөр илүүрхсэн. Хоёр дахь сет 59 минут үргэлжилж, 7-5-аар Шарапова хожиж, хожлын харьцааг 1:1 болгосон. Шийдвэрлэх гурав дахь сет 44 минут үргэлжилж, 6-4-ийн харьцаагаар Шарапова илүүрхсэнээр шигшээд шалгараад байна. Тэдний хувьд өнгөрсөн жилийн "Ролан Гаррос"-ын хоёрдугаар тойрогт учраа таарахад Шарапова (6-4, 6-4) илүүрхэж байжээ.

Мария Шарапова сүүлийн гурван жил дараалан "Ролан Гаррос"-ын шигшээд шалгараад байна. Тэрээр 2012 оны "Ролан Гаррос"-т түрүүлж байсан бол өнгөрсөн жилийн шигшээд дэлхийн тэргүүн теннисчин АНУ-ын Серена Уильямст ялагдаж байсан. Энэ жил аваргаа хамгаалахаар тоглосон Серена Уильямс тэмцээнийг хоёрдугаар тойргоос өндөрлүүлсэн.

27 настай нэрт теннисчин Мария Шарапова Мэргэжлийн эмэгтэй теннисчдийн холбооны (WTA) чансаагаар наймд бичигдэж буй. Тэрээр 17 настайдаа "Уимблдон-2014"-т түрүүлж, "Их дуулга"-ын анхны түрүүгээ хүртсэн. 2006 онд "Америкийн нээлттэй тэмцээн", 2008 онд "Австралийн нээлттэй тэмцээн", 2012 онд "Францын нээлттэй тэмцээн"-нд түрүүлснээр дөрвөн "Их дуулга"-ын цомыг хүртээд байна. Мөн "Лондон-2012" зуны олимпийн их наадмаас мөнгөн медаль хүртсэн. 

Тэмцээнд 18-т эрэмбэлэгдсэн Канадын Эжени Бушар "Ролан Гаррос"-т хоёр дахь жилдээ тоглохдоо хагас шигшээд шалгарсан амжилтыг үзүүлээд байна. Энэ жил 20 настай Бушар энэ оны анхны "Их дуулга" болох "Австралийн нээлттэй тэмцээн"-ийн хагас шигшээд шалгарсан бол "Ролан Гаррос"-т ч шилдэг тоглолтыг үзүүллээ.

Эмэгтэйчүүдийн хагас шигшээд нөгөө хэсгээс дөрөвт эрэмбэтэй Румын Симона Халеп, Германы Андреа Петрович нар шалгараад буй. Румын Симона Халеп 2009 оны "Ролан Гаррос"-ын аварга ОХУ-ын Светлана Кузнецоваг, Германы Петрович 2012 оны дэд аварга Италийн Сара Эррина нарыг хожиж хагас шигшээд шалгарсан. Тэдний хувьд аль аль нь "Их дуулга" тэмцээний оргил амжилтаа үзүүлээд байна. Энэхүү тоглолтод ялалт байгуулсан теннисчин бямба гаригт ОХУ-ын Мария Шараповатай аваргын төлөө тоглох юм.

НЭМЭЛТ: (01.31 цаг) Румын Симона Халеп, Германы Андреа Петрович нарын тоглолт энэ цагт өндөрлөлөө. 6-2, 7-6-ийн харьцаагаар Румын Симона Халеп ялалт байгуулснаар шигшээд шалгарлаа.

"Ролан Гаррос-2014"-ийн аваргын төлөө ОХУ-ын Мария Шарапова, Румыны Симона Халеп нар шалгараад байна. Эмэгтэйчүүдийн ганцаарчилсан төрлийн шигшээ тоглолт бямба гаригт буюу зургаадугаар сарын 7-нд болно. 

Ч.БОЛОР