Орчин үеийн гэрэл болон видео зургийн техник хэрэгсэл, технологийн дэвшилтэй холбоотой гэрэл зураг сонирхогчид байгалийн гэрэл зургийг ихээр авах боллоо. Зэрлэг онгон байгалийн амьд биесийн гайхамшигт агшиныг гэрэл зурагт буулгах замаар найман настай балчираас наян настай буурайд амьд байгалийн онцлог, хайрлан хамгаалах мэдрэмж, идэвх, сонирхлыг төрүүлэх нь бидний энэ ажлын үндсэн зорилго юм.

Мөн гэрэл зураг сонирхогчдыг олноор төрүүлэх, тэднийг байгальтай холбох гүүр болох, байгалийн амьд биесийн зан төрх, амьдралын хэв маяг, амьдрах орчны талаар танин мэдэхүйн мэдлэг хүргэхэд ч бидний зорилго оршино. Энэ жилийн гэрэл зургийн уралдаан нь “БИОЛОГИЙН ОЛОН ЯНЗ БАЙДАЛ MONGOLICA- 2013” нэртэй бөгөөд энэ нь Монгол орны зэрлэг онгон байгаль, биологийн олон янз байдлын гэрэл зургийг уралдуулах гэсэн утгыг агуулна. Энэ үйл ажиллагааг үндэсний хэмжээний нэгэн эвент болгон хөгжүүлэх улмаар дэлхийн төвшинд хүрсэн уралдаан болгох нь бидний хэтийн зорилго билээ. Гэрэл зургийн олон уралдаан зохион байгуулагддаг боловч амьд биесийн чиглэлээрх нь харьцангуй ховор байдаг. Тэр дотроо төрөлжсөн амьд байгалийн чиглэлийн үндэсний хэмжээнд зарлагдаж буй энэ төрлийн гэрэл зургийн уралдаан манай оронд одоо хир зохион байгуулагдаагүй юм. Иймээс энэ бол анхдагч ажлуудын нэг болно.

Ихэнх хүмүүс биологийн олон янз байдал ойлголтыг зөвхөн биологийн төрөл, зүйл, тэдгээрийн ялгаатай байдал хэмээн ойлгодог. Харамсалтай нь энэ бол их явцуу ойлголт юм. Биологийн олон янз байдал гэдэг нь нэг талаас, орчны олон янз нөхцөлд зохилдсон, хоорондоо шүтэлцсэн ген, бодгаль, популяци, зүйл, улмаар экологийн систем, биосферийн төвшний тухай; нөгөө талаас, эдгээр төвшинд хүн, түүний эзлэх байр суурь, нөлөөг авч үздэг экологи, эволюцийн түүхэн үйл явцыг тайлбарласан нийлмэл ойлголт юм. Иймээс ч биологийн олон янз байдлыг хөндөхөд генетикийн, фенотипийн, популяци, зүйл, бүлгэмдлийн, ландшафтын болон экосистемийн олон янз байдал, уур амьсгалын өөрчлөлт, харь зүйл, цөлжилт, тогтвортой ашиглалт, нөлөөлөх хүчин зүйл, хамгаалал зэрэг ойлголт уялдан гарч ирдэг.

Биологийн олон янз байдлыг цаг хугацааны хувьд авч үзвэл минут, цаг, өдөр, жил, улирал болгон эволюцийн төвшинтэй. Иймээс биологийн олон янз байдлыг олон өнцгөөс авч үзэх шаардлагатай. Байгаль орчин ногоон хөгжлийн яам, Байгаль хамгаалах сан санхүүжүүлэн, Монголын шувуу судлалын нийгэмлэг, Монгол улсын их сургууль санаачлан зохион байгуулсан Энэ жилийн гэрэл зургийн уралдааны нэр нь “МОНГОЛ ОРНЫ БИОЛОГИЙН ОЛОН ЯНЗ БАЙДАЛ MONGOLICA- 2013” бөгөөд энэ үйл ажиллагааг үндэсний хэмжээний нэгэн эвент болгон хөгжүүлэх улмаар дэлхийн төвшинд хүрсэн уралдаан болгох нь бидний хэтийн зорилго билээ.

Тус үйл ажиллагааг  2013 оны зургадугаар сарын 5-нд нээж, олон нийтэд зарлан нэг жилийн турш үргэлжилсэн бөгөөд уралдааныг дүгнэн, шагнал гардуулах хаалтын үйл ажиллагаа энэ сарын 05-ны өдрийн 16.00 цагаас Занабазарын нэрэмжит Дүрслэх урлагийн музейн, үзэсгэлэнгийн IV танхимд болно.

Эх сурвалж: www.mminfo.mn