Аваргын төлөө өрсөлдөх багууд тодорлоо

Монголын хөлбөмбөгийн холбооноос зохион байгуулж буй Ахмадын улсын аварга шалгаруулах тэмцээн хөлбөмбөгийн "Цэнгэлдэх хүрээлэн"-нд үргэлжилж байна.

Энэ сарын 26-нд эхэлсэн ахмадын улсын аварга шалгаруулах тэмцээн 37-42, 43-48, 49-55, 56-аас дээш насны дөрвөн ангилалд 27 багийн 450 гаруй тамирчид өрсөлдөж буй.

Тэмцээний хасагдах шатны тоглолт дуусч, аваргын төлөө тоглох багуудын нэрс тодорлоо.

Тоглолтын 37-42 насны ангиллын “Оюутан” -“Эрчим” багуудын тоглолтоор эхэлж, “Оюутан” баг “Эрчим” багийг 1:0 харьцаагаар ялснаар хагас шигшээд тоглох болзлоо хангасан. Харин “Андууд” – “ССТ” багуудын тоглолт ширүүн өрсөлдөөнөөр эхэлж багууд 2:2 харьцаагаар тэнцсэн бол тоглолтын сүүлийн мөчид “Андууд” багийн тоглогч Ц.Батсүх нэг гоол хийснээр хожил “Андууд” багт шилжиж, хагас шигшээд тоглох эрхтэй болсон.

43-48 насны ангилалд “Оюутан” – “NTV” багууд өрсөлдөж, “Оюутан”-ууд “NTV”-ийг 3:1 харьцаагаар буулган авсанаар хагас шигшээд тоглох эрхтэй болсон. Харин “Бурхан Халдун” – “Сүхбаатар Дүүрэг” багуудын тоглолт 2:1 харьцаагаар “Бурхан Халдун” ялалтыг авч мөн хагас шигшээд тоглох болзлоо хангалаа.

56-аас дээш насны ангилалд “Амиргүй” – “Алдар” багууд тоглож үндсэн цагт 0:0 харьцаатай тэнцэж, торгуулийн цохилтоор 6:5 харьцаагаар “Амиргүй” баг аваргын төлөө тоглох эрхтэй болж, “Алдар” багийнхан хүрэл медалийн төлөө тоглохоор боллоо. Харин “УБ Зүтгүүрийн Депо” баг “Соёмбын Барсууд” багийг 1:0 харьцаагаар буулган авч аваргын төлөө тоглох эрхтэй боллоо.

49-55 насны ангилалд “Урал” – “Эрдэнэт” багууд тоглож, үндсэн цагаар 0:0 харьцаатай хайнцаж, торгуулийн цохилтоор 4:5 харьцаагаар “Эрдэнэт” баг ялалт авлаа. Харин “Соёмбын Барсууд” – “УБ Зүтгүүрийн Депо” багуудын тоглолт 4:2 харьцаагаар дуусч “Соёмбын Барсууд” баг “Эрдэнэт” багтай аваргын алтан медалийн төлөө хүч үзэхээр болсон бол “Урал” – “УБ Зүтгүүрийн Депо” багтай хүрэл медалийн төлөө тоглохоор боллоо.

43-48 насны ангилалд “Хаан Хүнс” баг “Оюутан” багийг 6:5 харьцаагаар буулган авсан бол “Бурхан Халдун” баг “Зүүнхараа” багийг 3:1 харьцаагаар ялж, “Хаан Хүнс” багтай аваргын төлөө тоглохоор боллоо.

37-42 насны ангилалд “Замчин Сэлэнгэ” – “Оюутан” багууд өрсөлдөж 2:1 харьцаагаар “Замчин Сэлэнгэ” баг аваргын төлөө тоглохоор боллоо. Харин “MSM” – “Андууд” багуудын тоглолт 3:1 харьцаагаар дуусч “MSM” баг ялсан бол, “Андууд” – “Оюутан” багууд хүрэл медалийн төлөө шалгарсан талаар Монголын хөлбөмбөгийн холбооноос мэдээлэв.