УИХ дахь МАН-ын дарга М.Энхболд, бүлгийн дарга С.Бямбацогт  нар Эдийн засгийн хөгжлийн сайд Н.Батбаярыг огцруулах асуудлыг УИХ-ын даргад өргөн барьлаа.

"Н.Батбаяр сайдыг Засгийн газрын тухай хуулиар хүлээсэн “Хөрөнгө оруулалтын нэгдсэн бодлого, гадаадын хөрөнгө оруулалтын бодлого, зохицуулалт, бүртгэл, зээл, тусламжийн нэгдсэн бодлогын төлөвлөлт, боловсруулалт, удирдлага, зохицуулалт”-ын үүргээ өнгөрсөн хугацаанд хангалттай биелүүлж чадаагүй,  Засгийн газар 2013 онд улсын нэгдсэн төсвийн 6,177 их наяд төгрөгөөс гадна “Үнэ тогтворжуулах хөтөлбөр”, “Чингис бонд”, Хөгжлийн банкны санхүүжилтэд 13 их наяд гаруй төгрөг зарцуулсан, зарцуулсан мөнгө, авсан өр зээлийнхээ хэмжээгээр улсын эдийн засаг өөдлөн сэргэж, ард түмний амьдрал дэвжин дээшлэх ёстой байтал харин ч эсрэгээрээ уруудан доошилж байгаа" гэж МАН-ын бүлэг үзжээ.  

Мөн  "Эдийн засгийн алдаатай бодлогын уршгаар үндэсний мөнгөн тэмдэгт төгрөгийн ханш 30 гаруй хувиар суларч, түүхэнд байгаагүй дээд хэмжээнд хүрсэн, өргөн хэрэглээний бараа бүтээгдэхүүний үнэ 30-70 хувь өсч, үнэ дээшээ болж, амьдрал доошилж, банкны системийн чанаргүй зээлийн хэмжээ 612 тэрбум төгрөг болж, өнгөрсөн оныхоос 2.4 дахин өссөн үзүүлэлт зэрэг нь Н.Батбаяр сайдыг огцруулах үндэслэл болсон. Тиймээс УИХ дахь МАН-ын бүлэг эдийн засаг хүндэрч, ард олны амьдралд хүндээр тусч эхэлснийг жилийн өмнөөс удаа дараа сануулж, шахаж шаардаж байсан ч олонхи алдаатай бодлогоо улам даамжруулсаар өнөөгийн хямралт байдалд хүргэсэн тул УИХ дахь МАН-ын бүлгийн гишүүд бүрэн эрхийнхээ дагуу Эдийн засгийн хөгжлийн сайд Н.Батбаярыг огцруулах санал гаргаж байна" гэдгийг онцлов.

МАН-ын бүлгийн дарга С.Бямбацогт энэ үеэр "Огцруулах үндэслэлийг МАН-ын бүлэг олон удаа ярьж байсан. Долларын ханш өссөн, хөрөнгө оруулалт буурсан, эдийн засаг хямарсан энэ асуудлыг өмнө ч ярьж байсан. Ард түмэн ч мэдэж байгаа. Тиймээс бид эдийн засгийн хөгжлийн сайдыг огцруулах тогтоолын төсөл өргөн барьж байна" гэлээ.

МАН-ын бүлгээс өргөн барьсан сайд огцруулах тогтоолын төслийг хуулийн дагуу долоо хоногийн дотор холбогдох байнгын хорооны хуралдаанаар хэлэлцэх ёстой тул  ирэх долоо хоногийн пүрэв гаригт Н.Батбаяр сайдыг огцруулах асуудлыг Эдийн засгийн байнгын хорооны хуралдаанаар хэлэлцүүлэх бололтой.

МАН-ын өргөн барьсан шаардлагад дараах асуудлыг тусгажээ.

1. Засгийн газрын гадаад өр сүүлийн хоёр жилийн хугацаанд огцом нэмэгдэж, төсвийн зээлийн үйлчилгээний зардал 3-4 дахин өссөн. Засгийн газар өмнөх 22 жилд бий болсон нийт өр зээлээс 800 сая ам.доллараар илүү буюу 3 тэрбум ам.долларын өр үүсгэж ирээдүй хойч үеэ өрийн дарамтад орууллаа.  Гадаадын хөрөнгө оруулалтыг нэмэгдүүлнэ гэсэн амлалтаа Эдийн засгийн хөгжлийн сайд биелүүлж чадсангүй. УИХ-аас хэчнээн сайхан хууль, эрх зүйн орчныг бий болгож өгсөн ч түүнийг ажил хэрэг болгох чадвар салбар хариуцсан сайдад алга байна.

2. Төсвийн тухай хуульд заасан "Засгийн газар улсын хөрөнгө оруулалтын хөтөлбөрийг дөрвөн жилд нэг удаа баталж, жил бүр тодотгоно” гэсэн заалтыг биелүүлээгүйн улмаас Монгол Улс өнөөг хүртэл хөрөнгө оруулалтын нэгдсэн төлөвлөлт, хөтөлбөргүй, хөрөнгө оруулалт зүг чиггүй хийгдэж байна.

3. Монгол Улсын Үндэсний Аюулгүй байдлын зөвлөлийн зөвлөмжийн дагуу "Чингис" бондын санхүүжилтийн нэг ам.долларыг гурван ам.доллар болгож, эдийн засгийн үр ашиг бүхий төсөлд зарцуулах арга хэмжээг авч хэрэгжүүлсэнгүй. Үндэсний Аюулгүй байдлын зөвлөл энэ заалтыг биелүүлээгүй албан тушаалтанд хариуцлага тооцохыг зөвлөсөн нь Засгийн газрын гишүүн, Эдийн засгийн хөгжлийн сайд Н.Батбаярыг огцруулах хангалттай үндэслэл болно.

4. Улс орны ирээдүйн хувь заяагаар дэнчин тавьж авсан “Чингис”,  “Самурай бонд”-ын хөрөнгийг төсвийн бүрэлдэхүүн хэсэгт тусгахгүй дур мэдэн зарцуулж хууль зөрчсөн. 

5. Ерөнхий сайд Н.Алтанхуяг 10 хоногийн хугацаатай хариуцлага тооцох шаардлагад хариу өгөлгүй эдийн засгийн хямралын буруутнуудынхаа үйл ажиллагааг ил далдаар дэмжиж, улс орноо улам туйлдууллаа. Тиймээс МАН-ын бүлэг эдийн засгийг хямралд хүргэсэн албан тушаалтнуудын нэгийг нэр зааж огцруулахаар УИХ-д хандах нь зүйтэй гэж үзлээ.

Ш.ОЧ