Орос, Финландын хоккейчид шигшээд шалгарлаа

ОХУ-ын хоккейчид Шведийн багийг 3:1-ээр, Финланд Чехийг 3:0-ийн харьцаагаар хожиж, шигшээд шалгарлаа.

Беларусын нийслэл Минск хотноо үргэлжилж байгаа хоккейн насанд хүрэгчдийн 2014 оны Дэлхийн аварга шалгаруулах тэмцээний шигшээд өрсөлдөх багууд тодорлоо. Өчигдөр болсон хагас шигшээ тоглолтод ОХУ Шведийг 3:1-ээр, Финланд Чехийг 3:0-ийн харьцаагаар хожсоноор шигшээд шалгараад байна.

Дэлхийн шилдэг 16 баг өрсөлдсөнөөс шөвгийн наймын тоглолт дуулиан, шуугиантай өнгөрсөн. "Сочи-2014" өвлийн олимпийн наадмаас алтан медаль хүртсэн Канадын хоккейчид Финландад 2:3-ийн харьцаагаар хожигдсоноор V байрт шалгарсан. "В" хэсэгт ОХУ-ын араас хоёрдугаар байраар шалгарсан АНУ-ын хоккейчид Чехэд 3:4-ийн харьцаагаар ялагдаж, VI байрт шалгарлаа.

Энэ жилийн дэлхийн аваргын шигшээд сонирхолтой хоёр баг үлдлээ. Нутагтаа зохион байгуулсан анхны цагаан олимпиод Оросууд медалийн тоогоор илүүрхсэн. Гэвч тэдэнд ганц алтан медаль дутуу байсан нь эрэгтэй хоккейчид. Тэднийг медальд хүргэх замд зогсоосон баг бол Финландын хоккейчид. Сочид гялалзсан финландчууд Шведэд 2:1-ээр ялагдсан ч АНУ-ыг 5:0-ийн харьцаагаар хожиж, хүрэл медалийн эзэд болсон.

Харин Сочийн наадмын дараа болж буй дэлхийн аваргад нэг зоонд ОХУ, Финланд багтсан ч 4:2-ийн харьцаагаар Оросууд хожиж, хариугаа авсан. Энэ хэсгээс финландчууд дөрвөн хожил авснаар дөрөвдүгээр байраар шалгарч, олимпийн аварга Канадын аманд очсон. Гэвч тэд Канадын хүчирхэг багийг 3:2, Чехийг 3:0-ийн харьцаагаар хожиж, Оросын эсрэг гарч ирлээ. ОХУ-ын хоккейчдод Сочид ялагдсан ялагдал нь томоохон сургамж болж, Беларуст зөвхөн алтын төлөөл ирсэн. Тэр ч зорилгоо биелүүллээ. Хэсэгтээ зургаан хожил авч, Франц, Шведийг төвөггүйхэн хожсоноор шигшээд шалгарлаа.

Дэлхийн аварга шалгаруулах тэмцээний хүрэл болон алтан меадлийн төлөөх тоглолт маргааш Минск хотын "Минск Арена"-д болно.