М.Одгэрэл улсын аваргад түрүүлэх болзлоо хангалаа

Даамын спортын амьд домог, дэлхийн 13 удаагийн аварга Зоя Голубеваг “Улаанбаатар 2013” ДАШТ-ий арвангурав дахь өрөгт хожиж байсан спортын дэд мастер М.Одгэрэл улсын аваргад түрүүлэх болзлоо хангалаа.

Эрэгтэйчүүдийн 39 дэх, эмэгтэйчүүдийн 26 дахь удаагийн улсын аварга шалгаруулах тэмцээнийг Соёл спорт аялал жуулчлалын яам дэмжин, "Бодьбадмаараг" компани ивээн тэтгэн явуулж байна. Улсын аваргын шигшээ тэмцээнд эрэгтэй 14, эмэгтэй 12 тамирчин өрсөлдөж байгаагаас маргааш сүүлийн өрөг болж, улсын аваргын медальтнууд тодорно.

Эрэгтэйчүүдийг ОУИМ Д.Эрдэнэбилэг, ОУИМ Г.Ганжаргал нар адил 19 оноотой тэргүүлж байна. Тэдний хувьд маргааш болох сүүлийн 13 дахь өрөгт тоглох юм. Д.Эрдэнэбилэг улсын аваргад арван удаа, Г.Ганжаргал зургаан удаа түрүүлээд байна. Дэлхийн даамын холбооны мастер Р.Манлай, спортын мастер Ц.Хашчулуун нар 17 оноотой медалийн төлөө өрсөлдөж байна.

Эмэгтэйчүүдийн хувьд өнөөдөр улсын аварга даамчин тодроод байна. Өсвөрийн Ази тивийн аварга, спортын дэд мастер, "Шавь" цогцолбор сургуулийн 11-р ангийн сурагч Моломцамцын Одгэрэл улсын аваргад түрүүлэх болзлоо сүүлийн өргийн өмнө хангалаа. Тэрээр өнөөдөр аравдахь өргийн тоглолтод спортын мастер Б.Нандинцэцэгийг хожиж, улсын аваргын анхны медаль, тэр дундаа алтан медалийн болзол хангаад байна. Cпортын мастер Г.Амгалан 14, спортын мастер Е.Ариунзаяа, Ц.Энхцэцэг нар 13 оноотой медалийн төлөө өрсөлдөх юм. Монгол Улсын насанд хүрэгчдийн улсын хошой аварга, дэлхийн оюуны спортын наадмын багийн хүрэл медальт, спортын мастер Батдэлгэрийн Нандинцэцэг 12 оноотой V байрт бичигдэж байна.

Маргааш "Бадмаараг" төв дээр сүүлийн өрөг 09.00 цагт эхлэх бөгөөд 15.00 цагаас тэмцээний хаалтын ажиллагаа болно. Улсын аваргаас алт, мөнгөн медаль хүртсэн тамирчид ирэх зургаадугаар сард Малайзад болох Азийн аварга шалгаруулах тэмцээнд оролцох эрхийг авах юм.

Улсын аваргын арван удаагийн аварга Д.Эрдэнэбилэг, зургаа удаагийн аварга Г.Ганжаргал нар маргааш сүүлийн өрөгт тоглоно. Хожсон нь улсын аваргын түрүүгээ нэмэх бол тэнцсэн тохиолдолд коэффициентийн илүүгээр гавьяат тамирчин Д.Эрдэнэбилэг түрүүлэх болзлыг хангах юм.

Эрэгтэй: (12 өргийн дараа)