Өндөр амжилт гаргах агуу хүсэл тэмүүлэлтэй Өмнөд Африкт ирсэн АНУ-ын шигшээ баг өнгөрсөн шөнө Ганын багт нэмэлт цагт 2:1 харьцаатай ялагдсанаар нутаг буцах боллоо. Харин Ганын хувьд дэлхийн аваргын түүхэнд шөвгийн наймд шалгарсан ердөө гурав дахь Хар тивийн баг болсон юм.

Хоёр багийн тоглолтын үндсэн цаг 1:1 харьцаатай тэнцээгээр өндөрлөсөн учир нэмэлт цагт тоглолтын хувь заяаг шийдэх болжээ. Улмаар нэмэлт цагийн гурав дахь минутад Асамоа Гьян багтаа ялалтын гоолыг авчирсан байна. Тоглолтын дараа Гьян “Би дэлхий дээрх хамгийн жаргалтай хүн байх аа. 2006 онд бид хоёрдугаар шатанд шалгарч байсан, харин энэ удаад нэг алхам илүү алхлаа. Бид Гана улсын бас нэгэн бахархал, түүгээр ч зогсохгүй Африк тивийн бахархал боллоо” гэжээ. Өмнө нь 1990 онд Хар тивээс Камерун анхлан шөвгийн наймд шалгарч байсан бол 2002 онд Сенегаль тэдний амжилтыг давтсан билээ.

Тоглолтын ердөө тав дахь минутад Кевин-Принс Боатенг тооны харьцааг нээж, багтаа тэргүүлэл авчирсан боловч тоглолтын хоёрдугаар хагаст АНУ-ын супер од Лендон Донован торгуулийн цохилтоор тооны харьцааг тэнцүүлжээ.

Ганын “Хар одод” ирэх баасан гаригт Йоханнесбург хотноо Уругвайн багтай шөвгийн дөрвийн эрх булаалдана.

С.ЦЭЛМЭГ