Арбитрын хууль Үндсэн хууль зөрчөөгүй гэв

Хуучирсан мэдээ: 2014.05.14-нд нийтлэгдсэн

Арбитрын хууль Үндсэн хууль зөрчөөгүй гэв

Арбитрын тухай хуулийн зарим заалт нь Үндсэн  хуулийн холбогдох заалтыг зөрчсөн эсэх тухай маргааныг хянан шийдвэрлэх Үндсэн хуулийн цэцийн дунд суудлын хуралдаан өнөөдөр болж хуралдааны явцад мэдээлэл гаргагч иргэн С.Номынбаясгалан Арбитрын тухай хуулийн 8 дугаар зүйлийн 8.2, 18 дугаар зүйлийн 18.2 дахь хэсэг Үндсэн хуулийн холбогдох заалтыг зөрчсөн эсэхийг тогтоолгох тухай мэдээллийн шаардлагаасаа татгалзав. Өөрөөр хэлбэл Арбитраар хэрэг шийдүүлэх нь гэм бурууг зөвхөн шүүхээр шийднэ гэх утга бүхий заалтыг зөрчсөн байж болох тухай маргаан үүсээд байсан юм. 

Тус хуралдаанаас гаргасан Үндсэн хуулийн цэцийн дүгнэлтээр, арбитрч томилох, маргааны харьяалал тогтоох зэрэг асуудлаар аль нэг талын гомдлын дагуу давж заалдах шатны шүүх арбитрын ажиллагаанд оролцож байгааг шүүхийн журмаар маргааныг шийдвэрлэж буй ажиллагаа гэж үзэхгүй. Арбитрын  ажиллагаа нь талууд сайн дураар харилцан тохиролцож, өөрсдийн сонгосон хөндлөнгийн этгээдээр маргаанаа шийдвэрлүүлдэг шүүхийн бус арга болохыг үндэслэн Арбитрын тухай хуулийн 15 дугаар зүйлийн 15.8, 20 дугаар зүйлийн 20.6 дахь хэсэг нь Монгол Улсын Үндсэн хуулийн Арван зургадугаар зүйлийн 14/ дэх заалт, Дөчин наймдугаар зүйлийн 1 дэх хэсэг, Тавьдугаар зүйлийн 1 дэх хэсгийн 2/ дахь заалт, Тавьдугаар зүйлийн 2 дахь хэсгийг тус тус зөрчөөгүй байна гэсэн байна.

Э.ЭНХ

NewsMN Гар утасны хувилбар Татах
NEWS.mn

Мэдээллийн эх сурвалж