Сонирхогчдын сагсан бөмбөгийн хамгийн том лиг болох “Спрайт Супер лиг”-ийн аваргын төлөөх цувралын хоёр дахь тоглолтууд өчигдөр явагдаж, эрэгтэй, эмэгтэй аварга багууд тодорлоо. “Спрайт Супер лиг”-ийн 2014 оны улиралд эрэгтэй 24 баг, эмэгтэй шилдэг долоон баг таван сарын турш өрсөлдсөн юм. Ингээд өчигдөр лигийн шилдгүүд тодорч, шагналаа гардан авлаа.

“Спрайт Супер лиг”-ийн 2014 оны улирлын “Шилдэг дасгалжуулагч”-аар 13 хожил, гурван хожигдолтойгоор Зүүн бүсийг тэргүүлсэн “Ардын бүргэдүүд” багийн дасгалжуулагч Н.Баттулга шалгарлаа. Харин “Улирлын үнэ цэнэтэй тоглогч”-оор “Төв Ургац” багийн тоглогч Ц.Ганболд шалгарч, MVP-гийн цом, NBA China Game үзэх тасалбараар шагнууллаа. Тэрээр улиралд 15,1 оноо, 8,1 самбараас бөмбөг авалт, 3,2 бөмбөг таслалт гэсэн үзүүлэлт дунджилжээ.

“Спрайт Супер лиг”-ийн 2014 оны аварга багаар Д.Доржпүрэв эзэнтэй, Д.Эрдэнэбаатар дасгалжуулагчтай, Т.Мөнхсүлд ахлагчтай Төв аймгийн “Төв Ургац” баг тодорсон. Тэд аваргын төлөө цувралд 2-0-ийн харьцаатай ялалт байгуулсан юм. Аваргуудыг шагнал болох 10,000,000 төгрөг болон аваргын бөгж, малгай, подволк, алтан медаль, цомоор шагнаж урамшуулсан байна.

Лигийн дэд аварга багаар н.Ариунболд эзэнтэй, н.Эрдэнэчулуун дасгалжуулагчтай “Капитал Банк” баг шалгарч 3,000,000 төгрөг, мөнгөн медаль хүртлээ. Тэд бүсийн аваргын төлөө хүчтэй өрсөлдөгч болох Ж.Түмэн-Аюуш эзэнтэй “Хасу Мегаватт” багийг буулган авсан юм.

Харин хүрэл медалийн төлөө цорын ганц ширүүн тоглолт болсон. Улмаар Т.Лхагвасүрэн эзэнтэй Д.Одбаяр дасгалжуулагчтай, Д.Нямдаваа ахлагчтай ИНЕГ-ийн Буянт-Ухаа баг өрсөлдөгчөө буулган авч , 1,000,000 төгрөг, хүрэл медалиар шагнууллаа.

Мөн “Спрайт Супер лиг”-т эхний гурван байрт орсон эдгээр багууд ирэх улиралд сагсан бөмбөгийн дээд лиг болох “Үндэсний Супер лиг”-т дэвшин тоглох эрхтэй болж байгаа юм.

Мөн “Спрайт Супер лиг”-ийн 2014 оны эмэгтэй аварга багаар Д.Дэлгэрмаа дасгалжуулагчтай “ГурванТамир” баг шалгарч, 3,000,000 төгрөг болонаваргын бөгж, малгай, подволк, алтан медаль, цомоор шагнуулсан. Тэд аваргын төлөө цувралд 2-0 харьцаатай ялалт байгуулсан юм.

Харин лигийн дэд аварга багаар Б.Баярмагнай дасгалжуулагчтай “Дорноговь Таван Дохио” баг шалгарч 2,000,000 төгрөг, мөнгөн медалиар шагнууллаа.

Мөн “Финалын үнэ цэнэтэй тоглогч”-оор “Төв Ургац” багийн тоглогч Д.Мөнхтөр болон “Гурван Тамир” багийн Б.Солонго нар шалгарч ,MVP-гийн цом, NBA China Game үзэх тасалбараар тус тус шагнууллаа.

Т.МАША