Испанийн нийслэл хотын хоёр баг Европын тавцанд хэн нь шилдгээ үзэхээр Аваргуудын лигийн финалд шалгарсан үлдээд байгаа. Тавдугаар сарын 24-нд Португалийн нийслэл Лиссабон хотноо болох шигшээ тоглолтын үр дүн “Реал Мадрид” болон “Атлетико Мадрид” клубүүдийн аль нь энэ улиралд буурал тивийн хөлбөмбөгийн “мастер” нь болохыг харуулах учиртай. Хоёр багийн энэ улиралд үзүүлж буй  амжилтыг харьцуулбал хол зөрүү  гарахгүй ч санхүүгийн үзүүлэлтийн хувьд тэс ондоо.

“Forbes” сэтгүүлийн мэдээлснээр Аваргуудын лигийн есөн түрүүтэй “Реал Мадрид” клуб 3,44 тэрбум ам.долларын хөрөнгөөр Европын хамгийн үнэтэй багуудын жагсаалтыг тэргүүлсэн бол “Атлетико Мадрид” 328 сая ам.долларын хөрөнгөөр 17 дугаарт эрэмбэлэгджээ.

“Сантьяго Бернабеу” цэнгэлдэхийн эзэн “Реал”-ынхан 2012/2013 оны улиралд нийт 675 сая ам.долларын орлоготой байжээ. Үүнээс үйл ажиллагааны орлого нь 172 сая ам.доллараар хэмжигдэж байна.

Жагсаалтын хоёрдугаарт мөн Испанийн клуб “Барселона” бичигджээ. Тэдний хөрөнгө 3,28 тэрбум ам.доллараар үнэлэгдэж байгаа бол Английн “Манчестер Юнайтед” 2,81 тэрбумын хөрөнгөөр гуравт жагссан байна. Тэдний араас Германы “Байерн Мюнхен”, Английн “Арсенал” багууд бичигджээ.

“Forbes”-ийн хамгийн үнэтэй 10 баг:

1. “Реал Мадрид” 3,44 тэрбум ам.доллар
2. “Барселона” 3,2 тэрбум ам.доллар
3. “Манчестер Юнайтед” 2,81 тэрбум ам.доллар
4. “Байерн Мюнхен” 1,85 тэрбум ам.доллар
5. “Арсенал” 1,33 тэрбум ам.доллар
6. “Челси” 868 сая ам.доллар
7. “Манчестер Сити” 863 сая ам.доллар
8. “АС Милан” 856 сая ам.доллар
9. “Ювентус” 850 сая ам.доллар
10. “Ливерпуль” 691 сая ам.доллар

С.ЦЭЛМЭГ