Ширээний теннисний багийн ДАШТ-нд оролцож буй Монгол Улсын эмэгтэй баг хэсэгтээ гурван хожил, хоёр хожигдол авснаар III байраар шалгарч, 49-60-р байрын төлөө тоглохоор шалгараад байна.

Японы Токио хотноо 2014 оны багийн Дэлхийн аварга шалгаруулах тэмцээн үргэлжилж байна. Өнгөрөгч дөрөвдүгээр сарын 28-нд эхэлсэн 52 дахь удаагийн багийн ДАШТ-нд эрэгтэй 114, эмэгтэй 95 улсын баг оролцож байна. Тэмцээнд Монголын ширээний теннисний шигшээ багийн ахлах дасгалжуулагч Т.Энхтөрөөр удирдуулсан Монгол Улсын эрэгтэй, эмэгтэй баг оролцож буй.

Эрэгтэй тав, эмэгтэй дөрвөн бүсэд багууд эрэмбээрээ хуваагдсан бөгөөд бүс бүрт 24 баг багтсан. Харин Монгол Улсын эрэгтэй баг 103-т эрэмбэлэгдэж IV, эмэгтэй баг 71-т эрэмбэлэгдэж III бүсэд тоглож байна.

Эрэгтэй баг бүсдээ Перу, Ангол, Бахрайн, Мавришис /Франц/, Филиппин улсын багтай "N" хэсэгт багтсан. Хэсэгтээ Мавришис улсын багийг 3:0-оор хожсон ч Перу, Бахрайн, Филиппинд ялагдаж дөрөвдүгээр байрт бичигдэж байна. Өнөөдөр хэсгийн сүүлийн тоглолтоо Анголын багтай хийх юм. Манай эрэгтэй баг хэсэгтээ гуравдугаар байраар шалгарч чадвал 73-84-р байрын төлөө өрсөлдөх юм.

ОУХМ Б.Батхишигээр ахлуулсан эмэгтэй баг хэсэгтээ гурван хожил, хоёр хожигдол авснаар III байраар шалгарч, 49-60-р байрын төлөө тоглохоор шалгараад байна. Эмэгтэй багийн хувьд 2012 онд Германд болсон 51 дэх удаагийн ДАШТ-нд 70-р байр эзэлж байсан бөгөөд ийнхүү чансаагаа ахиулах боломжтой боллоо.

Эмэгтэй баг III бүсэд Казахстан, Гватемал, Сальвадор, Календониа(Франц), Азарбайжан улстай "А" хэсэгт багтсан. Азарбайжан (3:0), Сальвадор (3:0), Календониаг (3:0) хожиж, Гватемал(2:3), Казахстан(0:3)-д ялагдсанаар найман оноотой III байраар шалгарлаа. Энэ хэсгийг нэг ч хожигдолгүй Казахстан тэргүүлж, дөрвөн хожил, нэг хожигдолтой Гватемал улсын баг удаалав.

Эмэгтэй багийн мягмар гаригт /04,29/ Гватемалчуудтай хийсэн тоглолтыг бичлэгийг хүргэж байна. Энэхүү тоглолтод Гватемалчууд 3:2-оор ялалт байгуулжээ.

Тэмцээн ирэх даваа гариг буюу энэ сарын 5-нд өндөрлөнө.

Ч.БОЛОР