Германы “Байерн Мюнхен” багийн дасгалжуулагч Пеп Гуардиола Европын хөлбөмбөгийн холбооны Аваргуудын лигийн тэмцээний хагас шигшээ шатны шийдвэрлэх тоглолтын өмнө багийн гол тоглогч Фрэнк Риберийг чадах бүхнээ дайчлахыг шаардлаа. “Байерн Мюнхен” хагас шигшээд Испанийн эзэн хааны “Реал Мадрид” багтай учраа таарсан. Хоёр багийн хариу тоглолт өнөө шөнө 02:45 цагаас /Улаанбаатарын цагаар/ эхэлнэ. Өмнөх тоглолт “Реал Мадрид” багийн талбайд дөрөвдүгээр сарын 23-нд болж, талбайн эзэд 1:0-ийн харьцаатай хожсон билээ.

Харин өнөөдрийн шийдвэрлэх тоглолтын талаар “Байерн Мюнхен” багийн дасгалжуулагч Пеп Гуардиола:

-Бид “Реал Мадрид” багийн талбайд болсон эхний тоглолтод гоол оруулахыг хичээсэн. Гэхдээ амжилт олоогүй. Харин өнөөдрийн тоглолтод илүү олон гоол оруулахыг хичээх болно. Манай баг довтолж тоглохоос өөр аргагүй. Рибери бол манай багийн түлхүүр тоглогч. Тэр бүхнээ дайчилж тоглох ёстой. Би түүнийг талбайд “уурлаасай” гэж хүсч байна гэжээ.

Испанийн “Реал Мадрид” багийн хувьд эхний тоглолтод нэг гоол оруулж хожсон тул давуу талтай тоглоно. Гэхдээ нэг гоол гэдэг давуу тал биш гэдгийг “Реал Мадрид” багийн дасгалжуулагч Карло Анчелотти хэлсэн байна. Карло Анчелоттийг Аваргуудын лигийн мэргэжилтэн гэж хочилдог. Өнөө шөнө болох тоглолтын талаар “Реал Мадрид” багийн дасгалжуулагч Карло Анчелотти сэтгүүлчидтэй чөлөөтэй ярилцсан байна. Тэрээр:

-Гоол оруулахгүйгээр шигшээ тоглолтод шалгарна гэдэг боломжгүй зүйл. Тиймээс бид довтолж тоглох болно. Эхний тоглолтод хожсон ч гэлээ тун хангалтгүй тоглосон. Хэрвээ өнөөдөр муу тогловол тэмцээнээс хасагдах аюултай. Тоглолт маш хүнд болох нь тодорхой гэжээ.

Испанийн “Реал Мадрид” Германы “Байерн Мюнхен” багийг талбайд нь хэзээ ч хожиж байгаагүй гэсэн тоо баримт байна. “Реал Мадрид” баг “Байерн Мюнхен”-ий талбайд есөн удаа зочлохдоо найм хожигдож, нэг тэнцэж байжээ.

Б.БИЛЭГ